Տեսանյութեր
Լուսանկարներ
Էջմիածնում հարգեցին սերբ օդաչուների հիշատակը
Դեկտեմբերի 7-ը 1988 թվականի սարսափելի երկրաշարժի զոհերի հիշատակի օրն է: Երկրաշարժի զոհերի հիշատակը հարգելու հետ մեկտեղ Էջմիածնի հանրությունն ամեն տարի այս օրն այցելում է նաեւ Երեւան-Արմավիր մայրուղու ձախակողմյան հատվածում կառուցված սերբ օդաչուների հիշատակը հավերժացնող հուշարձանին:
Աղետալի երկրաշարժից անմիջապես հետո ողջ քաղաքակիրթ մարդկությունը օգնության շտապեց հայ ժողովրդին: Եվ ահա, հումանիտար օգնությամբ եւ տեխնիկական միջոցներով բեռնված հարավսլավական ինքնաթիռը աղետի ենթարկվեց Հայաստանի հողի այս հատվածում: Հայկական հողն էլ դարձավ բարի կամքի տեր եւ սերբ օդաչուների գերեզմանատեղին, իսկ նրանց հիշատակը հավերժող հուշարձանը կառուցվեց հենց վթարված ինքնաթիռի կմախքից:
Այսօր էլ հուշարձանին այցելեցին եւ թարմ ծաղիկներ դրեցին Էջմիածնի հանրության` հիմնարկ-ձեռնարկությունների, հասարակական, քաղաքական կազմակերպությունների ներկայացուցիչները` քաղաքապետ Կարեն Գրիգորյանի գլխավորությամբ: Հուշարձանի մոտ մեր թղթակցին տված հարցազրույցում Էջմիածնի քաղաքապետն ասաց, որ բոլորիս պարտքն է հարգել օտարազգի այս մարդկանց հիշատակը, ովքեր մեր նեղ պահին օգնության էին շտապում մեզ եւ իրենք էլ զոհվեցին քաղաքացիական պարտքը կատարելիս:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել