Դեկտեմբերի 9-ին, ժամը 15-ին, Երևանի Սիրահարների այգում տեղի կունենա Հռիփսիմե Սիմոնյանի հեղինակած «Արմենուհին» քանդակի բացման արարողությունը: Ժողովրդական նկարիչ Հռիփսիմե Սիմոնյանի ընտանիքի նվիրատվությամբ եւ Պողոսյան պարտեզներ ընկերության միջոցներով Երեւանի Սիրահարների այգում տեղադրվել է  կերամիկական արձան: «Հիշեցնենք, որ Հռիփսիմե Սիմոյանը մեկն էր այն արվեստագետներից, ով խորհրդային շրջանում վերածնեց հայկական ավանդական կերամիկական արվեստը: 1.9 մետր բարձրությամբ «Արմենուհի» կերամիկական քանդակը, որ նախկինում ցուցադրվել է միայի մեկ անգամ, այսուհետ գեղագիտական հաճույք կպատճառի այգու բազմաթիվ այցելուներին»,-տեղեկացնում է Պողոսյան պարտեզներ ընկերությունը: Առաջիկայում Երեւանի Սիրահարների այգում նախատեսվում է նաեւ մի շարք այլ քանդակների տեղադրում, որոնք կգան ամբողջացնելու այգու բարեկարգման համալիր ծրագիրը: