Այսօր Լոռու մարզի Ախթալա քաղաքի միջնակարգ դպրոցը անվանակոչվեց վարչապետ Անդրանիկ Մարգարյանի անվամբ: Անվանակոչությանը մասնակցում էր վարչապետ Տիգրան Սարգսյանը, Անդրանիկ Մարգարյանի այրին և  որդին` Տարոն Մարգարյանը: Արարողության սկզբում ողջույնի խոսքով հանդես եկան դպրոցի աշակերտները. «Անդրանիկ Մարգարյանը իր նպատակներին հասնում էր բարոյական սկզբունքներով»,- ասացին դպրոցականները և «խոստացան նրա նման լինել ազնիվ, սկզբունքային, գործունյա և հայրենասեր»: Դպրոցի տնօրեն Լեռնիկ Ճիճիլյանը, դիմելով Անդրանիկ Մարգարյանի ընտանիքին, ասաց. «Այսօր Ախթալայի համար պատմական իրողության  շրջադարձային փուլ է: Մեր դպրոցը այս տարի հիմնովին վերանորոգվել է, և այդ վերանորոգման խնդրում իր մեծ ավանդը թողել է երջանկահիշատակ պարոն Մարգարյանը: Այս տարվա օգոստոսին դպրոցի մանկավարժական խորհրդը որոշեց դպրոցը անվանակոչել Անդրանիկ Մարգարյանի անվամբ: Իհարկե, դա պարտավորեցնում է և մեծ պարտականություններ է դնում մեզ վրա»: Դպրոցի տնօրենը շնորհակալություն հայտնեց Անդրանիկ Մարգարյանի հարազատներին դպրոցի անվանակոչությանը մասնակցելու համար. «Կցանկանայի մեր բարեկամությունը Անդրանիկ Մարգարյանի ընտանիքի հետ շարունակվեր, մեր կապը միայն այս օրով չավարտվեր: Ես կցանկանայի դպրոցի խորհրդի պատվավոր նախագահի կոչում շնորհել Տարոն Մարգարյանին, որպեսզի էլ ավելի ամրացնենք կապը և կարողանանք համագործակցել և մեր սերնդին դաստիարակել ճիշտ այնպես հայեցի, ինչպես կցանկանար Անդրանիկ Մարգարյանը»: Տնօրեն Լեռնիկ Ճիճիլյանը նաև նշեց, որ իր ղեկավարած դպրոցի վերանորոգումը 100 տոկոսով իրականացվել է պետական բյուջեի սահմաններում, իսկ այդ միջոցները մայրաքաղաքից այս հեռավոր անկյունում ներդնելը նա համարեց պետական քաղաքականության լուրջ քայլերից մեկը: Նա ներկաներին նաև հայտնեց, որ ԱԺ պատգամավոր Վահե Հակոբյանը դպրոցին նվիրել է համակարգչային դասարան և այդ կապակցությամբ շնորհակալագիր հանձնեց ԱԺ պատգամավորին: Ելույթ ունեցավ նաև  Ախթալայի քաղաքապետ Հայկ Խաչիկյանը, որն էլ իր խոսքում ասաց. «Ես վստահ եմ, որ բոլոր ախթալեցիների համար մեծ պատիվ է ունենալ Անդրանիկ Մարգարյանի անվամբ դպրոց: Այսօր շահագործվեց Ախթալայի Բարիտ թաղամասի գազի խողովակաշարը, որն իրականացվել է Կառավարության միջոցներով: Այս դպրոցն էլ նույնպես այդ միջոցներով է վերանորոգվել, եկող տարի Կառավարության միջոցներով կիրագործվի քաղաքի ջրի ներքին ցանցի նորոգման աշխատանքներ և, իհարկե, առանց Կառավարության չէր կարող լինել այդ աշխատանքները»: Քաղաքապետ Խաչիկյանը տեղեկացրեց, որ համայնքը որոշում է կայացրել «Ոսկե նուռ» շքանշանով պարգևատրել և դրանով իրենց երախտագիտությունը  հայտնել կառավարության ղեկավար Տիգրան Սարգսյանին: Վերջինս քաղաքապետից ստանալով շքանշանը ասաց. «Շատ ճաշակով շքանշան է»: Անհասկանալի է, թե ինչու վարչապետին հանձնվեց շքանշանը, մանավանդ որ պրն վարչապետը գումարները հատկացրել էր պետբյուջեի գումարներից: Հանդիսավոր արարողությունից հետո վարչապետը և Մարգարյանի հարազատները շրջեցին վերանորոգված դպրոցում, այցելեցին նորաբաց համակարգչային դասարան: Վերջում դիտեցին վարչապետ Անդրանիկ Մարգարյանի կյանքի մասին ֆիլմ: