Տեսանյութեր
Լուսանկարներ
Կրթություն ընդդեմ թրաֆիքինգի
«Մարդկանց առևտուրը կանխելուն ուղղված դպրոցական կրթություն Հայաստանում Վրաստանում և Ադրբեջանում» տարածաշրջանային ծրագրի շրջանակում ՄԱԿ-ի հայաստանյան գրասենյակի նիստերի դահլիճում Միգրացիայի միջազգային կազմակերպության հայաստանյան գրասենյակն այսօր կազմակերպել էր աշխատանքային քննարկում, որին մասնակցում էին կրթության ոլորտի պատասխանատուներ և փորձագետներ:
Կրթության և գիտության նախարարության մամլո ծառայության փոխանցմամբ` ծրագրի շրջանակում հաջորդ տարի նախատեսվում է հանրապետության մի շարք դպրոցներում իրականացնել ուսուցիչների վերապատրաստման դասընթացներ. այդ նպատակով նախօրոք պատրաստվել են համապատասխան մասնագետներ:
Քննարկմանը ներկա կրթության և գիտության նախարարի տեղակալ Մանուկ Մկրտչյանը նշեց, որ այսօր դպրոցներում մեծ խնդիր կա «Դաստիարակության հայեցակարգի» հետ կապված, որն այժմ մշակման փուլում է: Նախարարի տեղակալը կարևորեց դաստիարակության դերը հասարակության և մասնավորապես, հանրակրթական ուսումնական հաստատությունների աշխատանքում:
«Ես առաջարկում եմ վերապատրաստման ընթացքում տեխնոլոգիաների տեսակետից չկաղապարվել և ստեղծագործաբար մոտենալ այս հարցին. կադրային քաղաքականության և մանկավարժական կատարելագործման ոլորտում անհրաժեշտ է նոր մոտեցումներ, տեխնոլոգիաներ և մեթոդիկաներ ամրագրել»,-փաստեց նախարարի տեղակալը:
Միգրացիայի միջազգային կազմակերպության հայաստանյան գրասենյակի ղեկավար Իլոնա Տեր-Մինասյանը նշեց, որ դեկտեմբերի 18-ը նաև Միգրանտների միջազգային օրն է, և այս հանդիպումն էլ լավագույն առիթ է մեկ անգամ ևս անդրադառնալ այս խմբում ընդգրկված մարդկանց իրավունքների պաշտպանությանը: «Մարդկանց առևտուրը համարվում է մարդու իրավունքների կոպիտ խախտում, և այս համատեքստում առավելապես խոցելի են դառնում հատկապես երեխաները, որոնք, լինելով դեռևս լիովին չձևավորված անձինք, ավելի հակված են վտանգներին»,-նշեց գրասենյակի ղեկավարը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել