Շենգավիթի հարկային տեսուչներ Հայկազ Հարությունյանի և Գագիկ Գևորգյանի  կողմից 2009թ. մայիսի 21-ին կազմվել է թիվ 1303066 ակտը, որտեղ ասվում է, որ ստուգմամբ պարզվել է, որ 2009-ի մայիսի 21-ին, ժամը 12:14-ին, Կարեն Հովհաննիսյանի խանութից գնում է կատարվել` գնվել է մեկ տուփ բնական հյութ` 250 դրամ արժողությամբ, որի գումարը վաճառքի պահին չի մուտքագրվել ՀԴՄ և ՀԴՄ-ի կտրոն չի տրամադրվել: «Ժամը 12:18-ին հանվեց «Z» հաշվետվություն, որտեղ արտացոլված էր 2720 դրամ օրական հասույթով»,- նշվում է կազմված ակտում: Այսպիսով, համաձայն ակտի` խախտվել է ՀԴՄ կիրառման մասին ՀՀ օրենքը, և նշված խախտումը մեկ տարվա ընթացքում կրկնվելու դեպքում առաջացնում է 150 000 դրամի չափով տուգանք: Կարեն Հովհաննիսյանը 2009-ի հուլիսի 1-ին հայցադիմում է ներկայացրել ՀՀ վարչական դատարան` ընդդեմ ՀՀ կառավարությանն առընթեր պետական եկամուտների կոմիտեի Շենգավիթի հարկային տեսչության, որով պահանջել է անվավեր ճանաչել տեսչության թիվ 1303066 ակտը և վերացնել այն: Օգոստոսի 27-ին Վարչական դատարան է ստացվել պետական եկամուտների կոմիտեի Մաշտոցի հարկային տեսչության պետի թիվ 3169 գրությունը, որով վերջինը տեղեկացրել է, որ պետեկամուտների կոմիտեի թիվ նախագահի թիվ 2016-Ա հրամանով անհատ ձեռնարկատեր Կարեն Հովհաննիսյանի հաշվառումը Շենգավիթի հարկային տեսչությունից տեղափոխվել է Մաշտոցի հարկային տեսչություն: Վարչական դատարանը որոշում է կայացրել փոխարինել պատասխանողին Մաշտոցի հարկային տեսչությունով: Անհատ ձեռնարկատեր Կարեն Հովհաննիսյանը ՀՀ իրավաբանական անձանց պետական ռեգիստրի Շենգավիթի տարածքային բաժնում գրանցված է որպես անհատ ձեռնարկատեր և Երևանի Ֆուչիկի թիվ 26-2 հասցեում մանրածախ առևտուր է իրականացնում: Հայցվորի խոսքով` տեսուչների կողմից փաստացի պարզաբանումներ չեն տրվել իրեն իր իրավունքների և պարտականությունների մասին: Տեսուչների կողմից առևտրի կետում փաստացի ստուգում չի իրականացվել: Ստուգման ակտն արդեն կազմված վիճակում տեսուչները ներկայացրել են հայցվորին և պահանջել, որ նա ստորագրի, ինչից Կ. հովհաննիսյանը հրաժարվել է: Հայցվորը գտնում է, որ Շենգավիթի հարկային տեսչության կազմած ակտը խախտումներով է կազմվել և ենթակա է վերացման: Պատասխանող վարչական մարմինն էլ գտնում է, որ անհիմն է հայցվորի ներկայացրած փաստարկներն, թե իրեն չեն պարզաբանվել իր իրավունքներն ու պարտականությունները: Անհիմն են հայցվորի պատճառաբանությունները, թե փաստացի ստուգում չի կատարվել: Ստուգման ակտում արձանագրվել է ստուգման ժամը, կատարված գնումը, որը հաստատվում է ՀԴՄ-ի «Z» հաշվետվության ժապավենով և ֆիսկալ չեկով: Ըստ պատասխանող կողմի` ստուգումն իրականացվել է «Ստուգումների մասին» ՀՀ օրենքի հիմքերով, և կազմված ակտը բխում է  ՀՀ օրենսդրության պահանջներից: Իսկ Կ. Հովհաննիսյանի հայցադիմումը զուրկ է իրավական հիմքերից և ենթակա է մերժման: Սեպտեմբերի 29-ին Վարչական դատարանը, դատավոր Տիգրան Մուկուչյանի գլխավորությամբ, վճռեց Կարեն Հովհաննիսյանի հայցն ընդդեմ ՀՀ  կառավարությանն  առընթեր պետական  եկամուտների կոմիտեի Մաշտոցի հարկային տեսչության` Հայաստանի Հանրապետության կառավարությանն առընթեր պետական եկամուտների կոմիտեի Շենգավիթի հարկային տեսչության  21.05.2009թ. թիվ 1303066 ակտն անվավեր ճանաչելու և այն վերացնելու պահանջի մասին հայցը բավարարել։ Դատարանը որոշեց անվավեր ճանաչել (վերացնել) պետեկամուտների կոմիտեի Շենգավիթի հարկային տեսչության  թիվ 1303066 ակտը, պետեկամուտների կոմիտեից հօգուտ Կարեն Հովհաննիսյանի բռնագանձել 4.000 դրամ` որպես վերջինիս կողմից կրած դատական ծախսի` պետական տուրքի հատուցում։ Վճիռը կամովին չկատարելու դեպքում այն կկատարվի  արդարադատության նախարարության դատական ակտերի հարկադիր կատարման ծառայության միջոցով՝ պարտապանի հաշվին։