2010-2011 ուսումնական տարում Արցախի պետհամալսարանում առկա ուսուցմամբ ընդունելություն կկատարվի 26, իսկ հեռակա` 15 մասնագիտությունների գծով: ԼՂՀ պետական եւ ոչ պետական հավատարմագրված բարձրագույն ուսումնական հաստատությունների առկա եւ հեռակա ուսուցմամբ 2010-2011 ուսումնական տարվա մասնագիտությունների եւ ընդունելության քննությունների` օրերս կառավարության հավանությանն արժանացած ցանկի համաձայն` նշված ուսումնական տարում ընդունելություն կկատարվի ՀՀ պետական ագրարային համալսարանի Ստեփանակերտի մասնաճյուղում, ինչպես նաեւ ոչ պետական հավատարմագրված` Ստեփանակերտի «Գրիգոր Նարեկացի», «Մեսրոպ Մաշտոց» համալսարաններում եւ «Գյուրջյան» կիրառական արվեստի ինստիտուտում: Ինչպես կառավարության նիստի ժամանակ տեղեկացրեց կրթության եւ գիտության նախարար Վլադիկ Խաչատրյանը, բոլոր տեղերում էլ ընդունելությունը կանցկացվի միասնական քննություններով: Ընդունելություն, ինչպես այս տարի, հաջորդ տարի նույնպես չի լինի հանրապետությունում գործող ոչ պետական բուհերում: Կառավարության նիստի ընթացքում վարչապետ Արա Հարությունյանը ներկաների ուշադրությունը հրավիրեց Արցախի պետհամալսարանում եւ «Գրիգոր Նարեկացի» համալսարանում առկա ստոմատոլոգիայի բաժնի վրա, ինչպես նաեւ խոսեց համալսարանում գործող ստոմատոլոգիական կլինիկայի պայմանների մասին: Առողջապահության նախարարը պարզաբանեց, որ պայմանները 80 տոկոսով համապատասխանում են լիցենզավորման պահանջներին: Վարչապետն էլ իր հերթին հանձնարարեց դրանք լիովին համապատասխանեցնել անհրաժեշտ պահանջներին: