Տեսանյութեր
Լուսանկարներ
Եվրոպական հանձնաժողովը 2 մլն եվրո է տրամադրում աղետների ռիսկերի նվազեցման համար
Եվրահանձնաժողովը 2 միլիոն եվրո է տրամադրել Հայաստանում, Վրաստանում և Ադրբեջանում աղետների դեմ պատրաստվածության համար, քանի որ Հարավային Կովկասում տարեցտարի ավելի հաճախ են ստիպված լինում դիմակայել այնպիսի բնական երևույթների, ինչպիսիք են սողանքները, սելավները, ջրհեղեղները և երկրաշարժերը:
Օգնությունը թույլ կտա ընդլայնել տեղական և ազգային իշխանությունների ունակությունները նման աղետների նկատմամբ պատրաստվածություն ցուցաբերելու և նրանց դիմակայելու հարցում: Դրամական օգնությունը կուղղվի Եվրոպական հանձնաժողովի Մարդասիրական օգնության վարչության միջոցով, որի համար պատասխանատու կլինի Կարել դե Գուխտը:
Ինչպես հայտնում են Հայաստանում Եվրահանձնաժողովի պատվիրակության մամլո ծառայությունից, ֆինանսավորումը նպատակ ունի ռազմավարությունների օժանդակման միջոցով մեծացնել տեղական համայնքների և հաստատությունների աղետներին դիմակայման ունակությունը և նվազեցնել նրանց խոցելիությունը, որն իր հերթին թույլ կտա նրանց ավելի լավ պատրաստվածություն ցուցաբերել, մեղմացնել և արձագանքել բնական աղետներին:
Ծրագրերը կօժանդակեն գիտելիքների համակարգումը և փոխանակումը ազգային և տարածաշրջանային իշխանությունների միջև: Նրանք նաև կտրամադրեն աղետների կառավարման հիմնարար գիտելիքներ, վերապատրաստում, վաղաժամ ազդարարման համակարգեր, ինչպես նաև կխթանեն տեղական համայնքների շրջանում իրազեկման արշավները, որոնք կներառեն նաև տարհանման վարժանքներ: Որոշ ոլորտներում կֆինանսավորվեն ենթակառուցվածքային փոքրածավալ աշխատանքներ և ծառայություններ:
Որպես հատուկ նշանակետ կլինեն կանայք, երեխաները և այնպիսի խոցելի խմբեր, ինչպիսիք են հաշմանդամները և էթնիկ փոքրամասնությունները:
Հանձնաժողովի կողմից ֆինանսավորված մարդասիրական ծրագրերն իրականացվում են հասարակական հումանիտար կազմակերպությունների, ՄԱԿ-ի մասնագիտացված գործակալությունների և Կարմիր խաչի համայնքների կողմից:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել