Տեղափոխում են Երեկ «Հայկական ժամանակի» իշխանական աղբյուրները թերթին տեղեկացրել են, որ մտադրություն կա քաղբանտրակյալ Սասուն Միքայելյանին այսօր տեղափոխել «Դատապարտյալների հիվանդանոց» քրեակատարողական հիմնարկ: Իրականում Միքայելյանը, ով դեկտեմբերի 16-ին «Արմենիա» բժշկական կենտրոնում ենթարկվել էր բարդ վիրահատության, դեռևս չի ապաքինվել` նրա մոտ դեռ թարախային պրոցեսներ և այլ խնդիրներ կան: Խփել-փախել են Երեկ սկանդալային միջադեպ է տեղի ունեցել Երևանի Թամանյան 3 հասցեի դիմացի մայթին: Ըստ ականատեսների, նշված հասցեում մայթի մոտ կանգնած է եղել «ՎԱԶ 2107» մակնիշի սպիտակ գույնի մի ավտոմեքենա: 80 ԼՏ 888 պետհամարանիշերով «Ֆոլկսվագեն» մակնիշի մի ջիփ, «ՎԱԶ 2107»-ին կողքից մի լավ ճզմելով, ի վերջո կայանվել է վերջինիս դիմացի մասում: Իսկ այդ պատմության ողջ հմայքը եղել է այն, որ տեղում եղած քաղաքացիները, ի դեմս ջիփից իջած ամուսինների, ճանաչել են ՀՀ ՍԴ նախագահ Գագիկ Հարությունյանին և նրա կնոջը: Նրանք, կարծես ոչինչ չի պատահել, առանց անհանգստանալու իրենց համար ավտոմեքենայից իջել և մտել են շքամուտք: Իսկ քիչ անց ինչ-որ մարդիկ են եկել և սկսել են ուսումնասիրել Գագիկ Հարությունյանի վարած ջիփը` համոզվելու համար, որ այն շատ չի վնասվել «ՎԱԶ 2107»-ը ճզմելուց հետո: Ջիփի վրա պարզապես մի փոքր տպված հետքեր են եղել` «ՎԱԶ 2107»-ի սպիտակ ներկի հետքերը: Թալանել են Ռազմիկ Զոհրաբյանին Երեկ թերթը տեղեկություններ է ստացել այն մասին, որ օրերս անհայտ անձը կամ անձինք թալանել են ՀՀԿ-ական պատգամավոր Ռազմիկ Զոհրաբյանի բնակարանը: Թերթի աղբյուրների փոխանցմամբ` գողերը հաջողացրել են պատգամավորի տնից տանել բավականին խոշոր գումար, ինչպես նաև զենքերի հարուստ հավաքածու: Ասում են, որ Զոհրաբյանն ամեն օր տեռորի է ենթարկում Մալաթիա-Սեբաստիա համայնքի ոստիկանությանը` նրանցից պահանջելով անհապաղ գտնել գողերին կամ գոնե իր զենքերը հայտնաբերել: Զոհրաբյանն այստեղ-այնտեղ լալահառաչ պատմում է, թե ինչ թանկ մարդիկ են իրեն այդ ամենը նվիրել, և որքան կարևոր են այդ զենքերն իր համար: Պատգամավորների պրովոկացիան Սասուն Միքայելյանին ազատ արձակելու խնդրանքով հանրապետության նախագահին 21 պատգամավորների կողմից դիմում ներկայացնելը Մարդու իրավունքների պաշտպան Արմեն Հարությունյանը պրովոկացիա է համարում: «Անկեղծ ասած, պատգամավորների` օրենսդիրներին դիմումը, ինչ-որ պրովոկացիա եմ համարում: Նրանք պետք է հասկանան, որ կա համաներման ինստիտուտ և ներման ինստիտուտ, և դրանք ունեն իրենց իրավական ռեժիմը: Նրանք հիանալի պետք է հասկանան, որ նմանատիպ ներման ինստիտուտը գործում է, երբ դատապարտյալն անձամբ է դիմում: Նմանատիպ քայլ անելը, ես անձամբ կոռեկտ չեմ համարում»,- երեկ ասաց Արմեն Հարությունյանը: Նա ցանկություն հայտնեց, որ այդ նույն պատգամավորները ցույց տան, թե ցանկության դեպքում երկրի ղեկավարը ինչպես կարող է առանց օրենքը խախտելու ներում շնորհել Սասուն Միքայելյանին: «Կան քայլեր, որոնք պիար ակցիա են քեզ համար, բայց դրանից որևէ օգուտ չկա, որովհետև գոնե օրնեսդիրները իրավական ռեժիմներին պետք է ծանոթ լինեն»,- եզրափակեց ՄԻՊ-ը: Կարելի է և հավատալ Նոր տարվա հրաշքին «Մարդիկ ապրելու, դժվարությունները հաղթահարելու համար պիտի ունենան երազանքներ ու հավատան հրաշքներին: Նոր տարին առիթ է` դրանք ամփոփելու և նոր երազանքների համար: Սա է թերևս Նոր տարվա խորհուրդը, առավել ևս` մեր ժամանակներում, երբ հոգու համար շատ քիչ բան կա: Հատկապես դժվար ժամանակներում հրաշքին հավատալը և հանուն դրա իրականացման աշխատելը կարևոր է յուրաքանչյուր մարդու համար` անկախ տարիքից»,- «Առավոտի» հետ զրույցում պատասխանելով հարցին, թե հավատո՞ւմ է Նոր տարվա հրաշքին և Ձմեռ պապին, ասաց ԱԺ նախկին նախագահ, անկախ պատգամավոր Տիգրան Թորոսյանը: «Բուդ ամեն մարդու տանը չկար» «Սեղանին պարտադիր պետք է լիներ պասուց տոլմա, խաշած կարմիր լոբի` վրան սոխ կտրատած: Բուդ ամեն մարդու տանը չկար: Դժվար էր ճարվում ամեն ինչ, մի երկու շիշ լիմոնադ, մի հավ` խանութներից ծանոթի միջոցով: Մամաս մեծ քառակուսի թավա էր վարձում, որի մեջ սիրուն սարքում, կտրատում էր փախլավան»,- հիշում է գեղանկարիչ Սամվել Սևադան: Արևմտահայերեն լուրեր` թուրքական հեռուստատեսությամբ Դեկտեմբերի 28-ին թուրքական հեռուստաընկերոթյուններից մեկը օրվա լուրերը կհեռարձակի նաև արևմտահայերենով: Այս հեռուստաընկերությունը ՏՍ TV-ն է, իսկ արևմտահայերենով լուրերը դեկտեմբերի 28-ից կհեռարձակվեն ժամը 20:00-ին: