![26-02_Hrachya-Avagyan 26-02_Hrachya-Avagyan](https://hetq.am/wp-content/uploads/2009/12/26-02_Hrachya-Avagyan.gif)
Երեկ Արագածոտնի մարզխորհրդի նիստի ժամանակ մարզպետարանի ՏԻՄ վարչության պետ Սիրասնիկ Հովսեփյանը դիմեց համայնքապետերին, որպեսզի իրենց համայնքներում կարգի բերեն անշարժ գույքի հետ կապված փաստաթղթերը` ասածը հղում անելով օրերս այդ հարցով մամուլի ասուլիսի հրավիրած Անշարժ գույքի պետական կադաստրի նախագահ Երվանդ Զախարյանին:
Երբ այդ մասին զեկուցում էր ՏԻՄ վարչության պետը, Բյուրականի գյուղապետ Հրաչյա Ավագյանը անմիջապես արձագանքեց եւ սկսեց մեղադրել Կադաստրին:
«Կադաստրի նոր պետին (նկատի ունի Երվանդ Զախարյանին,-հեղ.) չեմ ճանաչում, չգիտեմ ոնց է աշխատում, բայց Կադաստրից դառը փորձ ունենք: Բյուրականի վիճակը շատ անտանելի է: 2000 թվականից մինչ օրս բյուրականցիներին չեն տրամադրում սեփականության վկայականներ: Այդ հարցի կապակցությամբ մի հազար անգամ եղել եմ Կադաստրի կենտրոնական գրասենյակում: Դրանից հետո Աշտարակի գրասենյակին եմ դիմել: Ասում են հարցը կլուծենք, բայց ոչ մի բան չեն անում»,-հայտարարեց Հ. Ավագյանը:
Գյուղապետի ասելով` բոլոր համայնքներն էլ կախված են Կադաստրից, եւ ոչ մեկը «ռիսկ չի անում ասի», որ Կադաստրը գյուղացիներին դիտավորյալ տանում բերում է եւ հարցեր չի լուծում: «Վերջապես մարզպետարանը դրան պետք է ուշադրություն դարձնի, թե ոչ: Քարտեզները չի համապատասխանում իրականությանը, բնակիչների սեփականության վկայականները կեղծված են ներկայացվել նրանց: Կադաստրն ում սեփականության վկայական է տվել` բոլորը սխալ տվյալներով է»,-ավելացրեց գյուղապետը:
Երբ Հրաչյա Ավագյանը շարունակեց մեղադրանքներ ներկայացնել, Սիրասնիկ Հովսեփյանը ամբիոնից հայտարարեց, թե դա «իր մակարդակի հարց չէ» եւ իջավ բեմահարթակից: Դահլիճում հավաքված համայնքապետերը սկսեցին ծափահարել: Բյուրականի գյուղապետն այս անգամ էլ դիմեց մարզխորհրդին ներկա գտնվող ԱԺ պատգամավոր Լյովա Խաչատրյանին:
«Պարոն Խաչատրյան, նաեւ ձեզ եմ դիմում, որ բյուրականցիները բազմիցս նամակ են գրել Ազգային ժողովին, Կադաստրին: Գյուղացիները գնացել են Երեւան, բայց Կադաստրի պետը նրանց չի ընդունել` դա ավելի վիրավորական է: Եթե այս հարցը չլուծվի, մենք կդիմենք հեռուստաընկերություններին ու թերթերին: Շատ վատ է մեր վիճակը: Ես շատ վիրավորված եմ»,-հայտարարեց Հ. Ավագյանը:
Լ. Խաչատրյանն էլ պատասխանեց, թե ինքը, լինելով մարզից մեծամասնականով ընտրված պատգամավոր, Բյուրականից ոչ մի դիմում-բողոք այդ հարցով չի ստացել:
Արագածոտնի մարզպետ Սարգիս Սահակյանն էլ ասաց, թե այդ խնդիրն ունեն մարզի գրեթե բոլոր համայնքները, եւ Բյուրականը բացառություն չէ:
«Ամանորյա տոներից հետո այդ հարցով մարզպետարանում խորհրդակցություն կհրավիրենք եւ կկարգավորենք հարցը: Սկզբում Աշտարակի Կադաստրի պետին կհրավիրենք եւ կփորձենք հասկանալ` ինչ է կատարվում, եթե խնդիրն ավելի լուրջ եղավ` կհրավիրենք նաեւ Երվանդ Զախարյանին»,- խոստացավ մարզպետը եւ հորդորեց գյուղապետերին, որ այս հարցի շուրջ իրենց դիմում բողոքները ներկայացնեն մարզպետարան:
Նշենք, որ երբ Բյուրականի համայնքապետը բարձրաձայնում էր խնդիրը, կողքից համայնքապետերը «թաքուն» հավանություն էին տալիս Հ. Ավագյանի ասածներին, սակայն նրանցից ոչ մեկը բարձրաձայն չհայտնեց իր համայնքի բնակիչների նույն դժգոհությունը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել