Հարցազրույց Իսպանիայի «Ինտերէկոնոմիա» ռադիոընկերության տնօրեն, լրագրող Խավիեր Կաստրոյի հետ

Ի՞նչ տպավորություն եք ստացել Լոռու մարզի Թումանյանի տարածաշրջանի պատմամշակութային հուշարձաններից:

Ես Մադրիդից եմ եւ ներկայացնում եմ Իսպանիայի «Կատայի Տուրս» ընկերությունը, որը ցանկանում է Հայաստանը ներկայացնել Եվրոպային: Հայաստանը Եվրոպայում քիչ ճանաչում ունի, սակայն ունի տուրիստական շատ գրավիչ վայրեր: Ես իմ այցով պիտի աշխատեմ «Կատայի Տուրս» տուրիստական ընկերության միջոցով Հայաստանը ներկայացնել Իսպանիայում: Ես ներկայացնում եմ ռադիոհաղորդակցության ոլորտը, նաեւ` «Ինտերէկոնոմիա» ռադիոընկերությունը: Երկու օր է, որ այստեղ ենք: Հայաստան գալիս նախնական պատկերացում ունեցել եմ երկրի մասին: Բայց այն, ինչ տեսել ենք, գերազանցել է մեր սպասելիքները, եւ մենք շատ տպավորված ենք Հայաստանի հուշարձաններով եւ եկեղեցիներով: Շատ կցանկանայի, որ այստեղ պետությունը շատ ավելի լավ գիտակցեր իր ունեցած գանձերի կարեւորությունը, գինը եւ արժեքը եւ ավելի լավ պահպաներ այդ հուշարձանները, այսինքն` ամեն ինչ արվեր դրանք տուրիզմի համար ավելի գրավիչ դարձնելու ուղղությամբ: Ես շատ երկրներով եմ ճամփորդել, եղել եմ տարածաշրջանի բոլոր երկրներում, բացի Վրաստանից, նման ունիկալ, հետաքրքիր, յուրօրինակ հուշարձաններ ոչ մի տեղ չեմ տեսել: Թուրքիայի տարածքում, որտեղ գտնվում են Հայաստանի պատմամշակութային որոշ հուշարձաններ, տեսել եւ որոշ պատկերացումներ եմ ստացել, բայց այն, ինչ այստեղ եմ տեսել, անկրկնելի է: Ինձ հատկապես հիացրել է Գեղարդի եկեղեցական համալիրը, որը ժայռի մեջ է: Այսօր տեսել եմ Սանահինի եկեղեցին: Շատ տպավորված եմ Սանահինից, բայց կուզենայի ավելի լավ վիճակում տեսնել Սանահինը, որովհետեւ այն լքված տեսք ուներ: Մեզ համար, իհարկե, շատ հետաքրքիր է տեսնել տարբերությունները: Տեսնել լավ խնամված եկեղեցի, հետո տեսնել այնպիսի լքյալ եկեղեցի, ինչպիսին Սանահինն է: Կցանկանայի` ամեն ինչ արվեր, որ պահպանվեր եկեղեցին, քանի որ եկեղեցու գմբեթը ծածկված էր բուսականությամբ:

Ի՞նչ տպավորություն եք ստացել մեր տարածաշրջանի սպասարկման ոլորտից` սննդի հիմնարկներից, դրանք կարո՞ղ են բավարարել զբոսաշրջիկների պահանջները:

Այստեղ ես օգտվում եմ Ալավերդու «Ֆլորա» ռեստորանից: Այստեղ շատ լավ են սպասարկում, իրենք շատ սիրալիր են: Քանի որ բոլոր ռեստորաններում փորձել եմ, որոշ պատկերացումներ ունեմ: Այս ռեստորանում էլ ամեն ինչ շատ նորմալ է եւ շատ համեղ: Խորովածը, աղցանները: Մենք այսօր «Ֆլորայում» կերանք եւ խոզի, եւ հորթի խորոված: Իրենց խոզի խորովածը ինձ շատ դուր եկավ, բայց ես շատ զարմացած եմ հորթի խորովածից, որ շատ յուրօրինակ նրբահամ ուներ: Սա լավ է, բայց ավելի լավ կլիներ` նման տիպի ռեստորաններն ավելի շատ լինեին` նաեւ այն պատճառով, որ մարդիկ աշխատատեղեր ունենային:

Դուք նախադրյալներ տեսնու՞մ եք այս տարածաշրջանում տուրիզմի զարգացման համար:

Իմ կարծիքով` այո: Հայաստանում տուրիզմի ոլորտում աշխատող մարդիկ շատ սիրալիր են: Իսպանիայում չկան այսպիսի եկեղեցիներ: