Քրեակատարողական հիմնարկներում վերսկսվել են մոնիտորինգները
2002 թվականի հոկտեմբերից Ղարաբաղում գործող «Քաղաքացիական նախաձեռնությունների կենտրոն» ոչ կառավարական կազմակերպությունը տարվա ընթացքում մասնակցել է տարածաշրջանում անցկացված միջազգային տարբեր միջոցառումների, ինչպես նաեւ տեղում կազմակերպել է մի շարք միջոցառումներ:
Ամփոփելով անցնող տարվա աշխատանքները, կազմակերպության նախագահ Ալբերտ Ոսկանյանը լրագրողներին տեղեկացրել է, որ սեպտեմբեր ամսին կազմակերպության նախաձեռնությամբ կազմակերպվել է հարավկովկասյան «Ես մարդ եմ» կինոփառատոնը. սեպտեմբերի 28-30-ը կինոփառատոնի ֆիլմերը ցուցադրվել են Ստեփանակերտում, հոկտեմբերի 2-4-ը` Հադրութում եւ հոկտեմբերի 5-7-ը` Մարտունու շրջանի Գիշի գյուղում:
Տարվա ընթացքում կազակերպության ուշադրության կենտորնում են եղել նախկին ռազմագերիների եւ նրանց ընտանիքների խնդիրները:
2 տարվա ընդմիջումից հետո Քաղաքացիական նախաձեռնությունների կենտրոնը դեկտեմբերի 19-ից վերսկսել է իր մոնիտորինգների անցկացումը Ղարաբաղի քրեակատարողական հիմնարկներում: Կազմակերպության անդամներն այցելել են քրեակատարողական բաժին եւ ԼՂՀ ոստիկանության քննչական մեկուսարան:
Հիշեցնենք, որ 2003-ից կենտրոնը, հանրապետության իշխանությունների թույլտվությամբ, անց է կացրել պարբերական մոնիտորինգներ` Ղարաբաղի քրեակատարողական հիմնարկներում` ուշադրություն դարձնելով սանիտարահիգիենիկ, բժշկական սպասարկման, բարոյահոգեբանական վիճակի եւ այլ հարցերի վրա: Սակայն, 2007 թվականի հունիսին Ոստիկանության ծառայության ղեկավարությունը մերժել է կենտրոնին շարունակել մոնիտորինգը: 2007-ից մինչեւ 2009-ի աշունն ընկած ժամանակահատվածում կազմակերպության` մոնիտորինգները վերսկսելու հետ կապված երկրի ղեկավարությանն ուղղված նամակներն անպատասխան էին մնացել: Միայն այս տարվա նոյեմբերին նախագահ Բակո Սահակյանին ուղղված նամակից հետո կազմակերպությունը թույլտվություն ստացավ վերսկսել մոնիտորինգները:
Ալբերտ Ոսկանյանը հավաստիացնում է, որ կենտրոնը 2010-ին շարունակելու է իր աշխատանքները` նախկին ռազմագերիների, գերիների, նախկին բանտարկյալների եւ նրանց ընտանիքների անդամների, կրոնական փոքրամասնությունների հետ: Կազմակերպությունը նախատեսում է նաեւ շարունակել մոնիտորինգը քրեակատարողական հիմնարկներում:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել