Այսօր Ստեփանակերտում մեկնարկեց 2000թ. հունվարի 8-ին Հայաստանում ստեղծված «Ոսկրածուծի դոնորների հայկական ռեեստր» բարեգործական հիմնադրամի 10-ամյա հոբելյանին նվիրված դոնորագրման ակցիան: Ստեփանակերտի սպայի տանը ժամը 12-ից արդեն բազմաթիվ մարդիկ էին հավաքվել` մասնակցելու դոնորագրման ակցիային, որն ուղեկցվում է նաեւ համերգային ծրագրով:

Ակցիային մասնակցում էին նաեւ կազմակերպիչները` ԼՂՀ առողջապահության նախարար Արմեն Խաչատրյանն ու մշակույթի եւ երիտասարդության հարցերի նախարար Նարինե Աղաբալյանը, այլ պաշտոնատար անձինք: Հիշեցնենք, որ «Ոսկրածուծի դոնորների հայկական ռեեստր» բարեգործական հիմնադրամը ակցիաներ կկազմակերպի նաեւ Հայաստանի 10 մարզում եւ արտասահմանյան հայաշատ համայնքներում: Դոնորագրումն Արցախում առաջին անգամ չէ կազմակերպվում. ռեեստրի պատվավոր նախագահ, առաջին դոնորագրվող, ՀՀ երկրորդ նախագահի տիկին Բելլա Քոչարյանի անմիջական մասնակցությամբ 2002-2004 թթ-ին էլ է այստեղ դոնորագրում կազմակերպվել, որի արդյունքում ռեեստրը համալրվել է 805 արցախցի կամավորներով: Ընդհանուր առմամբ, կենտրոնում դոնորագրված է 15 հազար հայ: Այսօր մեկնարկած դոնորագրումը կշարունակվի մինչեւ ժամը 18-ը: