«Արձանագրություններում վերապահումներ անելը վնասակար կլինի Հայաստանի համար»
Սահմանադրագետ Վարդան Պողոսյանը քիչ առաջ «Հայացք» ակումբում ասաց, որ միջազգային պրակտիկայում ընդունված չէ, որ երկկողմանի պայմանագրերում կողմերից մեկը վերապահումներ կատարի: «Նման պրակտիկա գործում է բազմակողմանի պայմանագրերի վերաբերյալ, իսկ երկկողմանիի դեպքում վերապահումներ չեն արվում: Դա պարզապես անիմաստ է.
պատկերացրեք` մենք երկուսով պայմանավորվել ենք ինչ-որ բանի շուրջ, նույնիսկ գրավոր փաստաթուղթ ենք կնքել, բայց դուք գնաք տուն, մի երկու ժամից զանգեք եւ ասեք` ես սկզբունքորեն կողմ եմ, բայց իքս կետի վերաբերյալ վերապահումներ ունեմ: Այդ դեպքում բանակցային գործընթացի ժամանակ այդ հարցերը պետք է միասին կարգավորեիք»,- ասում է սահմանադրագետ Վարդան Պողոսյանը:
Արձանագրություններում վերապահումներ կարող է կատարել ՀՀ Ազգային Ժողովը, սակայն, ըստ փորձագետի, դա ձեռնտու չէ Հայաստանին. «Դրանով մենք գնում ենք Թուրքիայի ճանապարհով, ես նկատի ունեմ Էրդողանի հայտարարությունը, թե իրենք վերապահումների կարիք ունեն, պետք է հարցը կապեն ղարաբաղյան խնդրի հետ: Իմ կարծիքով` մենք որեւէ վերապահում չպետք է անենք: Դա իրավական առումով սխալ է, քաղաքական առումով` վնասակար»,- ասում է փորձագետը: Նրա կարծիքով` արձանագրություններն առանց վերապահումների ընդունումը առաջին հերթին Հայաստանին է ձեռնտու: Վարդան Պետրոսյանը հայ-թուրքական արձանագրությունների վերաբերյալ հունվարի 12-ին Սահմանադրական դատարանի կայացրած որոշումը որակեց որպես հայկական դիվանագիտական բացթողումների վերաբերյալ ճշտումներ կատարող փաստաթուղթ:
Մեկնաբանել