«Հրապարակ». Ստիպել են դիմում գրել
Հրանտ Շահինյանի անվան մարմնամարզության դպրոցի տնօրեն Արմեն Սարիբեկյանը, ով մի քանի ամիս առաջ էր նշանակվել տնօրեն, երեկ հրաժարականի դիմում է գրել: Թերթի տեղեկություններով' նրան կանչել են և առաջարկել դիմում գրել, ինչը վերջինս անխոս կատարել է: Սարիբեկյանը հաստատեց, որ հեռանում է տնօրենի պաշտոնից, բայց չմանրամասնեց, թե ինչու:
«Ես ոչ մի պրետենզիա չունեմ, ես ինքս եմ ուզել, դիմում եմ գրել ու հեռացել եմ: Ինձ ոչ ոք չի կանչել ու չի ստիպել դիմում գրել, իմ կամքով եմ հեռացել: Տնօրենի պաշտոնն ինձ դուր էր գալիս, աբսալյուտնը ոչ մի խնդիր չկար դպրոցում: Կոլեկտիվը հիանալի էր, մեկը մեկից լավ մարդիկ: Համենայնդեպս, էդ մի քանի ամսում, որ եղել եմ այնտեղ, մի բան դպրոցում հաստատ թողել եմ: Ես էլի սպորտի մեջ եմ, ֆեդերացիայի փոխնախագահն եմ»:
Իսկ հեռանալու պատճա՞ռը: «Պրոստը իմ անձնական խնդիրներն են: Ես ուրիշ բիզնես ունեմ և ավելի շատ ուզում են դրանով զբաղվել»:
Չնայած նախկին տնօրենը չգիտեր, թե ում են նշանակելու իր փոխարեն, սակայն թերթը ճշտել է, որ պաշտոնակատար է նշանակվել Կարեն Դանիելյանը, որը սպորտի հետ երբևէ կապ չի ունեցել: Ավելին, երեկ նա այցելել է սպորտդպրոց և աշխատողներին «զարմացրել» իր գիտելիքներով: Պարզվել է, որ մարմնամարզության դպրոցի տնօրենը գիմնաստիկան թեթև ատլետիկայից չի տարբերում:
Մեկնաբանել