Երեկ Երևանում կայացած մամլո ասուլիսի ժամանակ ՌԴ արտաքին գործերի նախարար Սերգեյ Լավրովը հայտարարել է. «Ռուսաստանը երախտապարտ է Հայաստանին 1855 և 1877-1878թթ. ռուս-թուրքական պատերազմներում զոհված Գյումրիում ռուսական բանակի 156 սպաների հուշարձանի պատրաստման հարցում աջակցության համար: Մենք պայմանավորվել ենք, որ այդ հուշարձանի բացումը դառնա Հայաստանում Մեծ Հայրենական պատերազմում հաղթանակի 65-ամյակի նշման կարևոր իրադարձություններից մեկը»:

Պատվի Բլուրը զինվորական գերեզմանատուն է Գյումրիում, որը ստեղծվել է 1855թ. Ռուս-թուքական պատերազմի հրամանատար, Կովկասյան կորպուսի գեներալ Ն. Մուռավյովի հրամանով: Պատվի Բլուրը հայ-ռուսական բարեկամության յուրահատուկ խորհրդանիշ է: Այստեղ իրենց հանգիստն են գտել 156 ռուս սպաների աճյունները: Գերեզմանատան կողքին գտնվող ռուսական մատուռի մուտքի վերևում գրված է` «Այստեղ խաղաղության և հանգստի արքայություն է»: Սակայն չդարձան մատուռն ու գերեզմանատունը խաղաղության և հանգստի արքայություն:

1956-1975թթ. քաղաքային իշխանությունների արհամարհանքի հետևանքով գերեզմանատունը քանդվեց, իսկ տապանաքարերը  ոչնչացվեցին: Բացի այդ, Պատվո Բլրի վրա կառուցվել էր մանկական պրոֆիլակտիկ հիմնարկ: Երկրաշարժից հետո այդ շինությունում ապաստան գտան 6 ընտանիք, իսկ գերեզմանատան տարածքը իրենից ներկայացնում էր տեխնիկական թափոնների աղբանոց:

Շիրակի մարզպետ Լիդա Նանյանի հրավերով 2009թ. սեպտեմբեր 15-ից 17-ը Հայաստանի Հանրապետությունում էր գտնվում Ուլյանովսկի մարզի պատվիրակությունը` նահանգապետ Սերգեյ Մորոզովի գլխավորությամբ: Հանդիպումների ընթացքում քննարկվեց Գյումրիում ռուս սպաներին հուշարձանի կանգնեցման և Պատվի Բլրի տարացքի բարեկարգման հարցը: Որոշում ընդունվեց ստեղծել համապատասխան հանձնաժողով` հասարակական գործիչ, Համահայկական միջազգային երիտասարդական կենտրոնի նախագահ Անդրանիկ Նիկողոսյանի ղեկավարությամբ: Պատվի Բլրի բարեկարգմանն առնչվող կազմակերպչական հարցերը լուծելու, ինչպես նաև հայ-ռուսական բազմակողմ համագործակցությունը առավել խորացնելու նպատակով, 04.11.2009թ. հիմնվեց «Պատվի Գործ» հայ-ռուսական բարեգործական կազմակերպությունը: Կազմակերպության համանախագահներ դարձան ՀՀ-ում ՌԴ գիտության, կրթության և արվեստի կենտրոնի տնօրեն, ՌԴ դեսպանատան խորհրդական Վիկտոր Կրիվոպուսկովը և հասարակական գործիչ, հանձնաժողովի նախագահ Անդրանիկ Նիկողոսյանը, որը հաշվետու ժամանակաշրջանում իրականացրել է 4 աշխատանքային այց Ուլյանովսկ, ինչի արդյունքում դեկտեմբերի վերջին սկսվել է շենքի քանդման գործընթացը:

ՀՀ-ում ՌԴ արտակարգ և լիազոր դեսպան Վյաչեսլավ Կովալենկոյի հետ խորհրդակցությունում հաստատվել են Պատվո Բլրի բարեկարգման և ռուս սպաներին հուշարձանի նախագծերը: Մենք հավատարիմ ենք Պատվո Բլուրը Մեծ Հաղթանակի 65-ամյակի օրերին բացելու պլանին, ինչը հայ-ռուսական դարավոր բարեկամության և ընդհանուր անցյալի ևս մեկ հիշեցում կլինի: Հայտնում ենք նաև, որ www.arm-ros.narod.ru <http://www.arm-ros.narod.ru> հասցեով գործում է «Պատվի գործ» հայ-ռուսական բարեգործական կազմակերպության կայքը, որտեղ առանձին էջ նվիրված է Պատվո Բլրի պատմությանն ու ժամանակակից փուլին: Այս աննախադեպ ծրագրի իրագործման համար, առաջին հերթին, պետք է արժանին մատուցել ՀՀ-ում ՌԴ արտակարգ և լիազոր դեսպան Վյաչեսլավ Կովալենկոյին, Ուլյանովսկի նահանգապետ Սերգեյ Մորոզովին, Շիրակի մարզպետ Լիդա Նանյանին, ինչպես նաև հանձնաժողովի նախագահ Անդրանիկ Նիկողոսյանին: Հենց նրանք են առաջին օրերից իրենց վրա վերցրել այդ հիրավի յուրօրինակ համագործակցության կայացման հետ կապված հիմնական դժվարությունները:

«Պատվի գործ» հայ-ռուսական բարեգործական կազմակերպության հասարակայնության հետ կապերի բաժին