Նկարիչների միությունում այս տարվա ցուցահանդեսների շարքը մեկնարկեց Արա Բաղդասարյանի  գրաֆիկիկական աշխատանքների անհատական ցուցահանդեսով: 

Ներկաների խոսքերով` Ա. Բաղդասարյանի աշխատանքների ցուցահանդեսն առանձնահատուկ է ոչ միայն նրանով, որ գրաֆիկական աշխատանքների ցուցահանդեսներ համեմատաբար քիչ են լինում, այլեւ նրանով, որ ցուցահանդեսը նաեւ հոբելյանական է. լրանում է նկարչի ստեղծագործական կյանքի 50-րդ տարին: Ցուցահանդեսի բացման խոսքում ՆՄ նախագահ Կարեն Աղամյանը կարեւորեց մեր երկրում գրաֆիկայի զագացումը` նշելով, որ Ա. Բաղդասարյանը գրքի ձեւավորման եւ գրաֆիկայի զարգացման գործում մեծ ներդրում ունի: Իսկ Ազգային պատկերասրահի տնօրեն Փարավոն Միրզոյանն անդրադարձավ ոչ միայն նկարչի` արվեստում ունեցած ավանդին, այլեւ լրատվամիջոցներին. «Ես չեմ հասկանում, էդ  30 հեռուստաընկերությունները, «Մշակույթ»-ի մշակութային բաժինն ինչո՞վ են զբաղված, ինչո՞ւ չեն եկել: Զարմանալի է, որ ՆՄ-ն սկսում է այս տարվա ցուցահանդեսների բացման շարքը, եւ ոչ մի հեռուստաընկերություն չի եկել լուսաբանելու»,- ասաց նա: Անդրադառնալով նկարչի ստեղծագործություններին` ասաց. «Ներկայացված աշխատանքներից յուրաքանչյուրի մեջ կա առանձին ոգի, յուրահատուկ մոտեցում, իսկ նրա ներդրումը ԵՊԳԱ-ի գրքի ձեւավորման եւ գրաֆիկայի բաժնում անգնահատելի է»: Արա Բաղդասարյանի խոսքերով` ինքը վաղուց եւ մեծ պատասխանատվությամբ է պատրաստվել այս ցուցահանդեսին. «Ես ոչ մի բան չեմ սպասում, ես ուղղակի նկարում եմ, ինձ համար կարեւորն այն է, որ մարդիկ կան, ում դուրը գալիս է իմ արվեստը, դրա համար էլ երկար եմ պատրաստվել այս ցուցահանդեսին եւ էլի շարունակելու եմ անել իմ գործը»: Ներկայացված աշխատանքներում կարելի է տեսնել մեզ հայտնի բազմաթիվ գրքերի պատկերազարդումներ և կերպարներ: Նկարչի արվեստում կարեւոր տեղ է զբաղեցնում նաեւ տառարվեստը, որի նմուշներից այսօր ևս ցուցադրված էին: Ցուցահանդեսից տպավորված էին հատկապես 181 դպրոցի 6-րդ դասարանի աշակերտները: Ներկայացված գործերից շատերը ծանոթ էին. «Մենք տեսել ենք այս աշխատանքները մեր դասագրքերում, դրանք մեզ հարազատ են ու շատ գեղեցիկ են արված»,- ասաց նույն դասարանի աշակերտ Էդմոնը: Ցուցահանդեսը այցելուների համար բաց կլինի  մինչեւ հունվարի 27-ը:

Մարիամ Մուղդուսյան