![](/static/articles/04/24/34/l-9Y4HRkNzdS.jpg)
Բագարանցիների արոտավայրերը գնել են ԱԺ պատգամավորները
Պատգամավորները մեկ հա հողը գնել են 23 հազար դրամով
Արմավիրի մարզի Բագարան գյուղի սկզբնամասում` բնակավայրից 2 կիլոմետր հեռավորության վրա, ձախ կողմի ժայռերից մեկի վրա վեր է խոյանում ԱԺ պատգամավոր Լեւոն Սարգսյանի (մականունը` Ալրաղացի Լյով) կիսակառույց առանձնատունը: Վայրի ընտրությունը պատահական չէ:
Առջեւում գեղեցիկ տեսարան է բացվում: Երեւում են թուրքական գյուղերը, Արաքս եւ Ախուրյան գետերի միահյուսման խառնարանը: Պատգամավորի դղյակից քիչ հեռու հանդիպեցինք նրա աշխատակցուհուն: Նա հաստատեց, որ տունն, իրոք, պատգամավոր Սարգսյանին է պատկանում, սակայն նրա անունը չգիտեր:
«Ում մոտ աշխատում եմ` ազգանունը Սարգսյան է: Ինքը Երեւանից է, բոյով մարդ է»,- ասաց աշխատակցուհին: Աշխատանքը կորցնելու մտավախությունից նա չցանկացավ անունը հրապարակել: Բագարանցիները նույնպես հաստատեցին, որ Լեւոն Սարգսյանի դղյակն է ժայռի վրա: Գյուղացիների պատմելով` ոչ միայն Լեւոն Սարգսյանը, այլեւ մի շարք պաշտոնյաներ առանձնահատուկ «սեր» ունեն իրենց արոտավայրերի նկատմամբ եւ հարյուրավոր հեկտար հողեր են գնել:
«Մեր արոտավայրերը հիմնականում գտնվում են սահմանի ներսում, ու ստեղ անհնար է անասուն պահելը, որովհետեւ հողերը վաճառված են: Ստիպված փշալարերից այն կողմ ենք անցնում, որ մեր անասուններին պահենք: Դրա համար էլ հատուկ թույլտվություն ու անցագիր է պետք»,- «Հետքին» ասաց բագարանցի Գրիգոր Ղազարյանը: Նրա խոսքով` մի շարք պաշտոնյաներ 2000 թվականից սկսած գյուղում մոտ 2000 հեկտար հող են գնել ու դրանք թողել ամայի:
«Ժողովուրդը պարապ ու սոված պատերի տակ կանգնած է, եթե դրանք մշակվեն, գյուղացիներն աշխատանք կունենան ու կկարողանան ապրել»,- ասաց Գ. Ղազարյանը: Համագյուղացի Վանյա Դավթյանի ասելով էլ` այդ տարածքում 100 հա դեղձի ու ծիրանի այգի է եղել, պաշտոնյաները դրանցով չեն հետաքրքրվել, ու այգիները չորացել են:
«Էդ կողմերը մեծ դժվարությամբ է ջուր գնում: Գնողները այդ հողերը որ մշակեն, հարյուրավոր աշխատատեղեր կլինեն»,- ավելացրեց Վանյա պապը: Բագարանի համայնքապետարանի դիմաց պարապությունից հավաքված տղամարդիկ ասում էին, որ գյուղում հարյուրավոր հա հողակտորներ ունեն ԱԺ պատգամավորներ Լեւոն Սարգսյանն ու Նահապետ Գեւորգյանը (մականունը` Նավո), երեւանցի ոմն Տիգրան Մկրտչյան եւ «ավստրալիացի» Կարոն:
Բագարանի համայնքապետ Գեւորգ Մարգարյանը «Հետքի» հետ զրույցում հաստատեց, որ գյուղի հողերից մոտ 2000 հեկտար վաճառվել է: Ըստ համայնքապետի` ինքն այդ ժամանակ գյուղի ղեկավար չի եղել եւ չի կարող ասել, թե ինչու են այդ հողերը վաճառվել: Գ. Մարգարյանի ասելով` հողերը վաճառվել են 1 հեկտարը մոտ 23 000 դրամով: Նրանից հետաքրքրվեցինք` արդյո՞ք գնորդները գյուղացիների հիշատակած բարձրաստիճան պաշտոնյաներն են:
«Չէ, գնորդները սփյուռքահայեր են»,- ասաց համայնքապետը: «ՀՀ քաղաքացիություն չունեցող մարդն ինչպե՞ս է հող գնել»,- հարցրինք նրան: «Դե չգիտեմ, երեւի իրանց անունով չեն հողերը: Իմ ժամանակ չի եղել, ես չգիտեմ»,- հնչեց պատասխանը: Մինչդեռ բագարանցիները պնդում էին, որ գյուղի «Նասոսնի» կոչվող տարածքում մեծ հողեր ունի հենց պատգամավոր Լեւոն Սարգսյանը եւ այդ մասին հնարավոր չէ, որ համայնքապետը չիմանա: «Մեկ-մեկ գործ է եղել, էդ մարդկանց մոտ աշխատել ենք, ո՞նց կարող ենք իրանց չիմանալ»,- նշեց Վանյա Դավթյանը: Բագարանցիների ասելով` հողերի վաճառքի դեմ նույնիսկ բողոքի ակցիաներ են կազմակերպել, բայց ապարդյուն:
Մեկնաբանել