«Մենք տնտեսական ճգնաժամից դուրս չենք եկել, մենք ավելի ենք խրվում, ու հավաստիացումները, թե արդեն դուրս ենք գալիս այդ ճգնաժամից, իրական չեն»,- այսօր «Հայացք» ակումբում լրագրողների հետ հանդիպման ժամանակ հայտարարեց ՀՀ նախկին վարչապետ Հրանտ Բագրատյանը: Նրա խոսքերով` մինչ 1994 թ.-ը Հայաստանի արտաքին պարտքը կայուն է եղել, իսկ 94-ից գնալով մեծացել է:

«Նախագահին զեկուցե՞լ են, որ մեր պարտքը 4 տարի հետո 483 մլն է դառնալու, որ 3 տարի հետո վարկի սպասարկման վրա ծախսվելու է 10 անգամ ավելի շատ փող, քան բանակի վրա, որն առանց այդ էլ չենք կարողանում պահել: Ու խոսքերը, թե Հայաստանին պարտք են տալիս, որովհետեւ վստահում են, ճիշտ չեն, քանի որ այսօր աշխարհում խնդրում են, որ պարտք վերցնեն, այն էլ այն պայմաններով, որով Հայաստանն է պարտք վերցնում»,- ասաց նա: Հրանտ Բագրատյանի համոզմամբ` այսօր Հայաստանում տնտեսության ոլորտը բեւեռացված է. «Այսօր հայերը գերադասում են իրենց հողերը տալ ուրիշին, որ բիզնես անեն, քան տալ սփյուռքահայերին: Հայաստանի 100 լուրջ բիզնեսների մեջ մի սփյուռքահայ չկա: Եւ սփյուռքում էլ գիտեն, որ հայերը փող վերցնելիս պատրաստ են, իսկ որ իրենց էլ տան հնարավորություն, նման բան չկա, թույլ չեն տալիս: Էլ չեմ ասում, որ որոշ մարդկանց կողմից իրենց 6-7 հեռուստաընկերություններով ստեղծվել է միկրոաշխարհ, որտեղ իրենց երգիչներով, շոումեններով ասում-խոսում, ուրախանում են»:

Նախկին վարչապետն անդրադարձավ նաեւ ապրիլի 1-ից ջրի սակագնի սպասվող թանկացմանը. «Ես չգիտեմ`  ինչու են բարձրացնում: Պայմանավորել դրանք ռուսական գազի բարձրացմամբ, սխալ կլինի: Չեմ հասկանում` ոնց է լինում` ջրի 1 խորանարդը 182 դրամ է, Կիեւում` 80, Բաքվում` ավելի էժան է, ողջ Կովկասում գոյանում է 21 մլն խորանարդ ջուր, որից 8-ը եւ ամենաշատը` Հայաստանում, իսկ 3 տոկոսը` Բաքվում, եւ մեզնից քիչ են վճարում, ու ընդհատումներ չեն լինում: Ջուրն ինքնահոսով գալիս է, ինչո՞ւ պիտի 182 դրամ լինի,- ասաց նա և ավելացրեց:- Ինչո՞ւ ենք իրանական գազամուղը բացել: Բա 100 մլն էլ դրա համար ենք պարտք արել: Եթե կառուցված է, ինչո՞ւ չենք օգտվում: Դա ալտերնատիվ էր, որ չթանկանա գազը: Մենք չենք հաղթահարում տնտեսական ճգնաժամը, եւ եթե մի բան չձեռնարկենք, մի քանի տարի անց չենք ունենա այն, ինչ հիմա ունենք»: Անդրադառնալով հայ-թուրքական արձանագրությունների վերաբերյալ ՍԴ-ի որոշմանը` Հ. Բագրատյանը հայտնեց. «Սկզբունքորեն նա պարտավոր էր այդ հայտարարությունը անելու, եւ ես այդտեղ մեկնաբանության արժանի բան չեմ տեսնում: Արձանագրությունների առումով կասեմ, որ Հայաստանը 1 զիջում արդեն արել է` Ցեղասպանության հարցը: Թուրքիան արդեն օրակարգից հանել է այդ հարցը, իսկ Ուկրաինան սառեցրել է Ցեղասպանության ընդունման գործընթացը: Սա դիվանագիտական խաղաթուղթ էր, որ զիջեց Հայսատանը: Դրանից հետո Թուրքիան էլի ինչ-որ բան ակնկալելու իրավունք չունի»:

Մարիամ Մուղդուսյան