«Սահմանադրական դատարանի որոշումը իրավական շրջանակներ դրեց, տարաբնույթ քննարկումները, քաղաքական շահարկումները նեղացում ապրեցին,- այսօր «Ազդակ» ակումբում լրագրողների հետ հանդիպման ժամանակ ասաց «Բարգավաճ Հայաստան» կուսակցության մամուլի խոսնակ Խաչիկ Գալստյանը, ապա շարունակեց:- Այն նաեւ հաստատեց, որ բանակցությունները երկկողմանի բնույթ են կրում, եւ 3-րդ պետության` Ադրբեջանի միջամտությունն այս հարցում նպատակահարմար չէ»:

Նա նշեց, որ այդ որոշումը 1-ին քայլերից է իրավական բազայի նախապատրաստման համար, որի հիման վրա հետագայում պետք է կառուցվեն 2 երկրների հարաբերությունները:  Խ. Գալստյանի խոսքերով` Թուրքիայի կողմից առաջադրված նախապայմանները կարող են հանգեցնել բանակցությունների ձախողման, ինչի պատասխանատվությունը կկրի Թուրքիան, իսկ եթե շարունակի նույն ոգով, Հայաստանին կտա դիրքերն ավելի կոշտացնելու հնարավորություն. «Երբեմն մտածում ես` արժե՞ Թուրքիայի հետ բանակցությունները հաջողությամբ պսակվեն, թե՞ Թուրքիայի ապակառուցողական դիրքերը մեզ ավելի մեծ հնարավորություն են տալիս»,- ասաց նա: Հայաստան-Ադրբեջան հակամարտությանն անդրադառնալով` ԲՀԿ մամուլի խոսնակն ասաց. «Որեւէ ուժ չի կարող ստիպել,  որ ՀՀ-ն միակողմանի զիջումների գնա, հատկապես Ղարաբաղյան հիմնահարցի դեպքում»: Այս հարցում բանախոսը կարեւորեց 2 երկրներում տարվող քաղաքականությանը. «Ադրբեջանը, մանկապարտեզից սկսած, վարում է հայատյաց քաղաքականություն, իսկ Հայաստանում նոր-նոր սկսել են առանձին դասերի միջոցով ներկայացնել իրականությունը` տեղեկացնելով մեր երիտասարդ սերնդին Բաքվում կատարված ոճրագործությունների մասին»: Մարիամ Մուղդուսյան