ՀՀԿ պատգամավոր Գալուստ Սահակյանը «Հայելի» ակումբում կայացած մամուլի ասուլիսի ժամանակ, անդրադառնալով Թուրքիայի արտգործնախարարության այն հայտարարությանը, թե հայ-թուրքական արձանագրությունների հետ կապված Հայաստանի Սահմանադրական դատարանի որոշման մեջ վերապահումներ կան, նշեց, որ պարզ է, որ թուրքական քաղաքականությունն ու քաղաքակրթությունն ինտրիգային են:

«Ամիսներ շարունակ փորձում էին արձանագրությունները ստորագրելուց հետո նոր մոտեցումներ ցուցաբերել: Բնականաբար, մեր կողմից դա մերժվում էր, քանի որ արձանագրությունների մեջ որևէ փոփոխությունների կարիք չկա: Փաստորեն, իր ինտրիգային քաղաքականությունը Թուրքիան մեկ բանով էլ ավելացրեց, թե իբրև թե ՍԴ-ի որոշումը նախապայմաններ առաջադրելն էր: Այնինչ որոշումը հետևյալն է, որ ՍԴ-ն ճանաչեց արձնագրությունների սահմանադրականությունը, ուրիշ ոչինչ: Դա մի պատճառաբանություն է, որով փորձում են իրենց արած խախտումները մեզ վրա բարդել, որը կարծում եմ` չի ստացվելու»,- ասաց նա: Գ. Սահակյանի խոսքով` միջազգային հանրությունը չի ընդունի Թուրքիայի այդ հայտարարությունը. «Վերջին հաշվով, կա Ազգային ժողով: Եվ կարծում եմ` ԱԺ-ն կհաստատի այն արձանագրությունները, որոնք մեր կամոք, մեր արտգործնախարարի ստորագրութամբ վավերացվել են: Թեև հնարավոր է` ավելի մեծ ինտրիգների հանդիպենք, քանի որ մենք շատ բարդ ու վտանգավոր ճանապարհ ենք ընտրել, որը, սակայն, մեզ համար պիտի հաղթահարելի լինի»: Գ. Սահակյանի կարծիքով` թուրքական կողմի նման հայտարարությունները ներքին սպառման համար են, քանի որ, ի վերջո, Թուրքիային ոչ ոք չի ստիպել այդ արձանագրությունները ստորագրել: Իսկ ահա Հայաստանի հայտարարությունները ներքին սպառման համար չեն, քանի որ հայկական կողմի քաղաքականությունն, ըստ Գ. Սահակյանի, բաց է, ինտրիգային չէ: «Եվ մեր դիվանագիությունը չի պատրաստվում նոր ինտրիգներ լարել»: Ըստ Գ. Սահակյանի` եթե Թուրքիան չվավերացնի արձանագրությունները, անվստահելի գործընկեր կճանաչվի միջազգային հանրության առաջ: «Արձանագրության ստորագրման պահին պետությունների բարձրաստիճան ներկայացուցիչներն էին կանգնած, ինչով ապացուցվում էր, որ նրանք երաշխավոր են: Փաստորեն, Թուրքիայի ներքին իրավիճակը և դիվանագիտական հարաբերությունները աշխարհի տարբեր պետությունների հետ անվստահելի մոտեցումներ են առաջացնում»,- ասաց նա` հավելելով, որ առաջինը Թուրքիան պետք է վավերացնի արձանագրությունները, քանի որ մեր վավերացնելուց սահմանները չեն բացվում, իսկ Թուրքիայի վավերացնելուց` բացվում են: «Հետևաբար, անհիմն է, որ առաջինը մենք վավերացնենք դրանք»,- ասաց նա: