Պարոն Հովիկ Աբրահամյանին ՀՀ ԱԺ նախագահ Երեւան, Հայաստանի Հանրապետություն Հարգելի պրն Աբրահամյան, Տեղեկացնում ենք Ձեզ, որ օրեր առաջ ԱԺ պատգամավոր Զարուհի Փոստանջյանի օգնական Սեդա Մելիքյանը ԵԽԽՎ-ում ԱԺ պատվիրակության քարտուղարի կողմից հեռախոսով տեղեկացվել է, որ տիկին Փոստանջյանը չի մեկնելու Ստրաբուրգ` ԵԽԽՎ հանձնաժողովների եւ Վեհաժողովի աշխատանքներին մասնակցելու: Բնական է, որ խմբակցության կողմից հիշյալ հեռախոսազանգը չի կարող համարվել պաշտոնական իրազեկում:

Այդ իսկ պատճառով «Ժառանգություն» խմբակցության անունից դիմում եմ Ձեզ` կազմակերպելու ԵԽԽՎ-ում Եվրոպական ժողովրդական կուսակցություն - EPP խմբի բյուրոյի, Վեհաժողովի «Մոնիտորինգի» եւ «Գիտության, կրթության, մշակույթի» հանձնաժողովների, « Մշակութային ժառանգության», «ԶԼՄ-ների», «Քրեական պրոբլեմների» եւ «Ահաբեկչության դեմ պայքարի» ենթահանձնաժողովների մշտական անդամ Զարուհի Փոստանջյանի ուղեւորությունը Ստրասբուրգ հունվարի 24-ից 30-ը` վերոթվարկյալ հանձնաժողովների ու Վեհաժողովի լիագումար աշխատանքներին մասնակցության համար: Ակնկալում ենք նաեւ Ձեր հանձնարարականը, որպեսզի հայկական պատվիրակության քարտուղարը կազմակերպի տիկին Փոստանջյանին ուղեկցող Ստյոպա Սաֆարյանի (ում ծախսերը կհոգա «Ժառանգություն» կուսակցությունը)` ԵԽԽՎ շենք մուտք գործելու համար անհրաժեշտ փաստաթղթերի ստացումը: Սպասում ենք սույն նամակի գրավոր պատասխանին հնարավորինս սեղմ ժամկետներում: Բացասական պատասխանի դեպքում` նաեւ հիմնավորումներ: Հարգանոք` Ստյոպա Սաֆարյան Խմբակցության ղեկավար