Ըստ թուրքագետ Լեւոն Հովսեփյանի՝ Թուրքիայի եւ Իսրայելի միջեւ առճակատումը չի բերի ռազմական բախման: Այս խնդրում շահագրգիռ չէ նաեւ ԱՄՆ-ն, քանի որ երկուսն էլ նրա դաշնակիցներն են: Սակայն իրավիճակն գնալով ավելի հետաքրքիր երանգներ է ստանում:

Ռազմական փորձագետ Արծրուն Հովհաննսիյանը նշում է, որ Թուրքիայի եւ Իսրայելի միջեւ ռազմական ոլորտի շատ ծրագրեր կանգնեցվել են: Նորից սկսել է լարվածություն նկատվել իսրայելաեգիպտական հարաբերություններում, ինչին իր հայտարարություններով ու քայլերով նպաստել է նաեւ Թուրքիան: Փորձագետը կարծում է, որ հենց միայն ԱՄՆ-ի միջամտության շնորհիվ հնարավոր չէ թուրք-իսրայելական ուղիղ բախում, սակայն միգուցե դա տեղի ունենա միջնորդավորված՝ Եգիպտոսի միջոցով:

Բանախոսները ԱՄՆ-ի համար կշեռքի նժարներին չեն դնում Թուրքիային ու Իսրայելին՝ նշելով, որ երկուսն էլ իրենց դերակատարությամբ նշանակալի են ԱՄՆ-ի համար: Իսրայելը ԱՄՆ-ի համար առաջին հայացքից ամենամեծ գործընկերն է, սակայն Թուրքիան իր աշխարհագրական դիրքով շատ մեծ կշիռ ունի:

Լ. Հովսեփյանը դժվարանում է նշել, թե թուրք-իսրայելական լարվածության ֆոնին ինչ օգուտ կարող է ստանալ Հայաստանը: Սակայն նա նշում է, որ Իսրայելն արդեն սկսել է համագործակցել Կիպրոսի ու Հունաստանի, իսկ Թուրքիան՝ Եգիպտոսի հետ: Ըստ նրա՝ Ցեղասպանության ընդունման հավանականություն կա, քանի որ Իսրայելն այն երկիրը չէ, որ անպատասխան թողնի Թուրքիային, ինչի մասին խոսում է նաեւ իսրայելական մամուլը: Մյուս կողմից՝ կան տվյալներ, որ Իսրայելը աշխատանքներ է տանում թուրքաբնակ քրդերի հետ, ինչը նույնպես խոսում է Թուրքիայի քայլերին համարժեք պատասխանի մասին: