ՀՀ Մարդու իրավունքների պաշտպան Արմեն Հարությունյանն այսօր նամակ է հղել ՀՀ Արդարադատության նախարար Գևորգ Դանիելյանին: Ստորև ներկայացնում ենք նամակը: Հարգելի պարոն Դանիելյան, Իմ հանձնարարությամբ աշխատակազմի աշխատակիցները 26.01.2010 թ. հանդիպել են ՀՀ ԱՆ «Դատապարտյալների հիվանդանոց» ՔԿՀ-ում կալանք կրող Սասուն Միքայելյանին, որը հայտնել է, որ ունի սրտի հետ կապված խնդիրներ, որի կապակցությամբ անհրաժեշտ է իրականացնել սրտի և սրտանոթների հետազոտություն (կառոռանոգրաֆիա), ինչը անհնար է կատարել ՀՀ ԱՆ «Դատապարտյալների հիվանդանոց» ՔԿՀ-ում: Խնդրել է` հնարավորության դեպքում հետազոտությունը կատարվի «Նորք-Մարաշ» բժշկական կենտրոնում: Բացի դրանից` դատապարտյալ Ս. Միքայելյանը հայտնել է, որ պատերազմական գործողությունների ընթացքում ստացված բեկորային վնասվածքի հետևանքով որոշ բեկորներ չեն հեռացվել իր աջ ոտքից, ինչը ուժգին ցավեր է պատճառում իրեն: Խնդրել է հնարավորության դեպքում կատարել ոտքի վիրահատություն: Ելնելով վերոգրյալից` խնդրում եմ քննարկել դատապարտյալ Ս. Միքայելյանի` «Նորք-Մարաշ» բժշկական կենտրոնում հետազոտություն անցկացնելու, ինչպես նաև հնարավորության դեպքում միջոցներ ձեռնարկել լուծելու դատապարտյալ Ս. Միքայելյանի ոտքի վիրահատության հետ կապված խնդիրը: Հարգանքով` Ա. Հարությունյան