Մոնիտորինգային ընդդիմություն Երեկ Եվրոպայի խորհրդի Խորհրդարանական վեհաժողովի Բյուրոյի նիստում փակ գաղտնի քվեարկությանբ այդ կառույցի մոնիտորինգի հանձնաժողովում որպես Հայաստանի «ընդդիմության ներկայացուցիչ»` ընտրվել է դաշնակցական Արմեն Ռուստամյանը: Քվեարկության արդյունքում «Ժառանգության» ներկայացուցիչ, ԵԽԽՎ-ում հայկական պատվիրակության արդեն փոխարինող կազմի անդամ Զարուհի Փոստանջյանը ստացել է 10, Ա.Ռուստամյանը` 15 ձայն: Այսպիսով, երեկ ավարտված ԵԽԽՎ ձմեռային նստաշրջանում հայկական պատվիրակությունը «լավագույնս լուծեց» իր առջև դրված գերխնդիրը` Զարուհի Փոստանջյանին մեկուսացնել ԵԽԽՎ-ում Հայաստանին վերաբերող հարցերի քննարկումներից, և արդեն կարող է կատարյալ ներդաշնակության մթնոլորտում աշխատել մեր իշխանությունների սիրելի Պրեսկոտի ու Կելումբիեի հետ: Իսկ թե ինչ գին է վճարել Հայաստանը, որ ԵԽԽՎ-ում ընդդիմության մանդատը ստանա «հատկապես կարևորագույն գործերով ընդդիմադիր» Արմեն Ռուստամյանը, պարզ կդառնա առաջիկա իրադարձություններից: Առջևում ղարաբաղյան հակամարտության կարգավորման հարցում նոր զարգացումներ են սպասվում: Ադրբեջանական բանակ. 6 զոհ, 2 վիրավոր Հենվելով Ադրբեջանի պաշտպանության նախարարության տարածած տեղեկության վրա` ադրբեջանական «Վեստի.ազ»-ը նշում է, որ հունվարի 28-ի ժամը 18-ին Ադրբեջանի բանակի «անհայտ» զորամասում 6 զինվոր է մահացել: Անհայտ պատճառներով 2 զինվոր ավտոմատից կրակ է բացել զինակիցների վրա, 4 զինվոր մահացել է, 2-ը` ծանր վիրավորվել: Հանցագործությունը կատարելուց հետո 2 «հրաձիգները» ինքնասպանություն են գործել: Ադրբեջանական «Ազադլիգ»-ը տեղեկացնում է, որ ադրբեջանական «անհայտ» զորամասը գտնվում է Դաշքեսանում, իսկ զինվորները կրակ են բացել զորամասի հրամանատարության վրա. մահացել է զորամասի հրամանատարը, շտաբի պետը ծանր վիրավորվել է: «Ազադլիգ»-ը շարունակում է. «Զինվորներն այնքան են շահագործվել ու ստորացվել հրամանատարության կողմից, որ դիմել են նման քայլի»: Այնուամենայնիվ, բանակում կարևորը զորքի որակն ու թարմությունը չէ, այլ հոգեբանական վիճակը. դա է մարտունակության միակ գրավականը: Հատկանշական է, որ ադրբեջանական բանակի իրական դեմքը ևս մեկ անգամ պարզ դարձավ այն օրը, երբ ողջ հայությունը նշում էր հայոց հաղթանակած բանակի օրը: Քուշկյանի պորտֆելն է ուզում Ընդամենը մի քանի ամիս առաջ Իրանի Իսլամական Հանրապետությունը պաշտոնապես հայտարարեց, թե դադարում է ճանաչել Հայաստանի Հանրապետության Մխիթար Հերացու անվան պետական բժշկական համալսարանի դիպլոմը: Թե ինչն էր պատճառը, որ մեր հարևան հանրապետությունը նման որոշում կայացրեց, այն ժամանակ որևէ մեկն այդպես էլ չփորձեց բացատրություն տալ: Օրերս թերթը տեղեկացավ, թե որն է եղել Իրանի կառավարության որոշման դրդապատճառը: Ամեն ինչ տեղի է ունեցել այն բանից հետո, երբ Իրանի Իսլամական Հանրապետություն է հրավիրվել բժշկականի ռեկտորը` տխրահռչակ Գոհար Քյալյանը: Բավական ներկայացուցչական գիտաժողովի ժամանակ վերջինս ամբիոնից սկսել է ապացուցել, որ պարսիկ բժիշկ Ավիցենան հայկական ծագում ունի, և որ նրա նախնիները հայ են եղել: Այս անգրագիտությունից վրդովված` Իրանի համապատասխասխան գերատեսչությունները որոշում են կայացրել իրենց հանրապետության տարածքում այլևս չճանաչել մեր բժշկականի դիպլոմը: Ի դեպ, կտրուկ նվազել է իրանցի ուսանողների հոսքը բժշկական համալսարան: Բոլոր նախադրյալները կան պնդելու, որ հերթը հնդիկներինն է: Ի դեպ, իշխանությանը մոտ կանգնած թերթի աղբյուրները փախնցում են, որ բժշկական համալսարանի շուրջ ծավալված վերջին իրադարձությունների արդյունքում սրվել են Գոհար Քյալյանի և ՀՀ առողջապահության նախարար Հարություն Քուշկյանի հարաբերությունները, որոնք մինչ այդ էլ առանձնապես լավ չէին: Ասում են, որ Քյալյանն ամեն ինչ անում է, որ կարողանա ձեռք գցել Քուշկյանի աթոռը, այսինքն` դառնալ ՀՀ առողջապահության նախարար: Կաշառակե՞րը Երեկ թերթին հայտնի է դարձել, որ Աշխատանքի տեսչության պետ Արթուր Պետրոսյանը, ով ԲՀԿ քվոտայով նշանակվելու է Սպորտի նախարար, բավականին հետաքրքիր անցյալ ունի: Թերթի տեղեկություններով` նոր նախարարը 1995 թվականին մեղադրվել է կաշառակերության մեջ, հարուցված է եղել քրեական գործ, եւ նա փախել է Բուլղարիա: Սա երեւում է անգամ նրա կենսագրությունից, որտեղ նշվում է, թե Ա. Պետրոսյանը 1991-1995 թթ. եղել է ՀՀ հարկային տեսչության օպերատիվ վարչության պետ, պետի տեղակալ, առաջին օգնական: Իսկ ահա 1995-1998 թթ-ի մասին նշված է, որ նա ապրել է Բուլղարիայում: Իշխանափոխությունից հետո նա վերադարձել  է ՀՀ, 1999-2003 թթ. եղել է ԱԺ նախագահի խորհրդական, ՄԱԿ-ի ցուցակով դարձել է ԱԺ պատգամավոր, 2009-ի փետրվարից դարձել է ԲՀԿ-ական, 2009-ի հուլիսին նշանակվել Աշխատանքի տեսչության պետ: Ճանաչեք հայ եկեղեցու իրավունքները Թուրքիայում ԵԽԽՎ-ն հունվարի 27-ին բանաձեւ ընդունեց Թուրքիայում ոչ մահմեդական փոքրամասնությունների խղճի ազատության եւ մարդու այլ իրավունքների մասին: Բանաձեւի 19.2 կետի համաձայն` Վեհաժողովը կոչ է անում Թուրքիայի իշխանություններին. «Իրավաբանական անձ ճանաչել Ստամբուլի էկումենիկ ուղղափառ պատրիարքարանը, Ստամբուլի Հայ Կաթողիկե եկեղեցին» եւ այլն: Ըստ ԵԽԽՎ այս բանաձեւի` «Իրավաբանական անձի կարգավիճակի բացակայությունը, որն անդրադառնում է բոլոր համայնքների վրա, անմիջական հետեւանքներ ունի սեփականության իրավունքի եւ գույքի կառավարման առումով»: Հանում են «Արարատ» բառը Թուրքիայի կրթության նախարարությունը գրաքննության է ենթարկել այդ երկրի միջնակարգ դպրոցների աշխարհագրության դասագրքերը: Բոլոր դասագրքերում «Արարատ» բառը պարտադիր կերպով պետք է փոխարինվի «Աղրը դաղ» անվանումով: Սահմանափակել սահմանափակը Երեկ կառավարության որոշմամբ հաստատվեց քրեակատարողական ծառայության ներքին կանոնակարգում կատարված փոփոխությունը` դատապարտյալներին եւ կալանավորվածներին այսուհետեւ արգելվում է լուսանկարվել, տեսանկարահանվել կամ ձայնագրվել խցերում: Դա կարելի է անել միայն հատուկ սենյակներում: Սա նշանակում է, որ լրագրողները, իրավապաշտպանները, ՀԿ-ները եւ այլ կազմակերպություններ, անգամ ազատազրկված անձանց համաձայնությունն ունենալով, իրավունք չունեն ֆիքսել ազատազրկվածների պահպանման պայմանները, ցույց տալ, թե ինչ կենցաղ ունեն այս մարդիկ: Մերոնք որոշում են աղբը տնից չհանել, սահմանափակել սահմանափակը եւ բոլոր պայմանները ստեղծել ՀՀ կալանավայրերում օպերների բեսպրեդելի եւ ծաղկուն կաշառակերության համար: