«Որքան էլ Ադրբեջանը հակահայկական քարոզչություն անի, ադրբեջանցիները լավ գիտեն, որ արցախահայությունը պատրաստ է մինչեւ վերջ կանգնել իր հողի համար»,- կարծում է ռազմական հոգեբան Դավիթ Ջամալյանը: Քիչ առաջ «Հենարան» ակումբում նա ասաց, որ ադրբեջանական հանրույթը պատրաստ չէ հարձակվողական պատերազմի, քանի որ հարեւան պետությունը սխալ է նախապատչաստել իր բնակչությանը դրան: Մասնավորապես` անտեսվել են հարձակվողական պատերազմի խոցելի կողմերը: Նախ այն, որ հարձակվող կողմը առնվազն 3/1-ի, իսկ միջինում 7/1-ի հարաբերությամբ կորուստներ է ունենալու: «Իսկ պաշտպանող կողմը միշտ գիտի, թե ինքը ինչ է պաշտպանում, այնպես որ հարձակվող բանակը պատշաճ պատասխան ստանալու դեպքում, շատ արագ բարոյալքվելու է»,- նշեց Պաշտպանության հանրային խորհրդի անդամ Դավիթ Ջամալյանը: Անդրադառնալով Ադրբեջանի ներքաղաքական խնդիրներին` բանախոսն ասաց, որ Ադրբեջանը անհաջող հարձակվողական պատերազմ սկսի, ապա հնարավոր է, որ Ադրբեջանում ապրող ազգային փոքրամասնությունները կարող են ապստամբություն սկսել եւ պառակտել երկիրը: «Ադրբեջանն, ըստ էության բռնապետույուն է, եւ ազգային փոքրամասնությունները ճնշված են այնտեղ, սակայն ինքնությունը հնարավոր չէ խորտակել ճնշումներով, այն պատեհ առիթով գլուխ է բարձրացնելու: Լեզգիների, ավարների, թալիշների ինքնությունը լիովին մեռած չէ»,- նշեց Դավիթ Ջամալյանը: Բացի այդ` ադրբեջանական բանակի բարոյահոգեբանական վիճակը նույնպես, մեղմ ասած, բարձր մակարդակի վրա չէ: «Հարձակվող բանակի բարոյահոգենական մթնոլորտը պետք է պաշտպանվողից մի քանի անգամ բարձր լինի, իսկ մեր նրանցից եթե բարձր էլ չէ, ապա հաստատ չի զիջում»,- ասաց ռազմական հոգեբանը: Ինչ վերաբերում է ռազմական ոլորտում Ադրբեջանի ներդրած ֆինանսական միջոցներին, ապա Դավիթ Ջամալյանը կասկածում է, որ այդ փողերը ծառայում են իրենց նպատակին` հաշվի առնելով հարեւան երկրում առկա կոռուպցիան: