Նախորդ տարիներին, երբ կառավարության կողմից սուբսիդավորվում էր ազոտական պարարտանյութի գինը, եւ գյուղացին մեկ պարկի համար վճարում էր 3600 դրամ, Արագածոտնի մարզ ներկրվում էր մոտ 2300 տոննա պարարտանյութ: Անցյալ տարի կառավարությունն այլեւս չսուբսիդավորվեց պարարտանյութի համար, ինչի հետևանքով մարզ է ներկրվել մոտ 5 անգամ պակաս պարարտանյութ` 440 տոննա, արդեն 5900 դրամ արժեքով: Արագածոտնի մարզպետարանի գյուղատնտեսության եւ բնապահպանության վարչության պետ Յուրա Ազատյանը «Հետքին» փոխանցեց, որ խնդիր կա առաջիկայում համայնքներին տրամադրել, ինչպես ֆոսֆորական, այնպես էլ կալյումական պարարտանյութերի խմբաքանակ: Այժմ ազոտական պարարտանյութի մեկ պարկի գինը 6200 դրամ է: Արմավիրի մարզում ստացվել է կոնցետրացված պարարտանյութ, որի մեջ ազոտը 36 տոկոս է, ֆոսֆորը` 14, իսկ կալիումը` 12 տոկոս: Պարարտանյութի մեկ պարկի գինն արժե 7500 դրամ: «Մշակաբույսերի պարարտացումն ընթանում է միակողմանի սնուցումով` միայն ազոտական պարարտանյութով: Հաշվի առնելով ներկայացված վիճակագրությունը` հնարավորության սահմաններում խնդրում ենք կառավարությունում քննարկել պարարտանյութի սուբսիդավորման հարցը»,- նշեց Յու. Ազատյանը: Վարչության պետի ասելով` գյուղատնտեսական մշակաբույսերից ստացված բերքն ավելի բարձր կլիներ, եթե հացահատիկի համար նախատեսված դաշտերում կիրառվեր պարարտացում ֆոսֆորական եւ կալիումական պարարտանյութերով, իսկ մշակովի ցանքատարածությունները պարբերաբար չտուժեին հաճախակի կրկնվող կարկտահարություններից: 2009 թվականին բնական աղետներից տուժել է մարզի 38 համայնք` 2489 հա ընդհանուր տարածքով: Վնասը կազմել է 1.16 միլիարդ դրամ: Մարզի Աշտարակի տարածաշրջանի 10 համայնքներում տեղադրվել են 15 հակակարկտային կայաններ: Յուրաքանչյուր համակարգ ապահովում է 100 հա տարածքի անվտանգությունը: Առաջիկա 4 տարիների ընթացքում Արագածոտնի մարզում կտեղադրվեն եւս 47 հակակարկտային կայաններ, որոնցից 34-ը գազագեներատորային, իսկ 13-ը` ռեագենտային: Այս տարվա ընթացքում կտեղադրվի 10-ը գազագեներատորային հակակարկտային կայաններ: