Թվացյալ անմեղ մի զբաղմունք, ինչպիսին ինտերնետային շփումն է, Գյումրիում 2009թ-ի ապրիլի 15-ի ողբերգական ավարտ ունեցավ: 17-ամյա Տիգրան Թադեւոսյանը հարկ չէր համարել ընդունել Լիդա Եդիգարյանի ընկերություն անելու երկիմաստ առաջարկը «Օդնոկլասսնիկի» կայքում եւ պատասխանել էր «փախար, քու…» արտահայտությամբ: Քիմիայի պարապմունքից դուրս գալով, ուսուցչուհու շենքի մոտ Լիդա Եդիգարյանի ընկերները Տիգրանին այնպես էին ծեծել, որ նա 10 օր անգիտակից վիճակում մնալուց հետո մահացել էր: Տիգրանին ծեծի ենթարկելու առիթով համապատասխան քայլերի չդիմած ոստիկանների՝ Գյումրիի ոստիկանության 1-ին բաժանմունքի պետ Աշոտ Թափալցյանի եւ նույն բաժանմունքի հետաքննիչ Սիմոն Սարգսյանի դեմ հարուցվել էր քրեական գործ ՀՀ քրեական օրենսգրքի 308-րդ հոդվածի 1-ին մասով՝ պաշտոնական լիազորությունների չարաշահում: Սույն քրեական գործի քննությունն ավարտվեց 2009 թ.-ի նոյեմբերի 16-ին: Քանի որ դեպքը կատարվել էր ապրիլի 15-ին, դատարանը կիրառեց ՀՀ ԱԺ «Համաներում հայտարարելու մասին» 19.06.2009 որոշման 1-ին կետի 1-ին ենթակետը՝ ամբաստանյալներ Աշոտ Թափալցյանին ու Սիմոն Սարգսյանին ազատելով պատժի կրումից: Անջատված մասով քրեական գործի քննությունը սկսվեց այս տարվա փետրվարի 17-ին: Ամբաստանյալի նստարանին էր հայտնվել Տիգրան Թադեւոսյանին ծեծի ենթարկած 4 տղաներից միայն Սամվել Սարգսյանը, մնացած երեքի նկատմամբ հետախուզում է հայտարարված: Սամվել Սարգսյանին առաջադրվել է մեղադրանք քրեական օրենսգրքի 112 հոդվածի 2-րդ մասի, 6-րդ եւ 14-րդ կետերով: 8-ամյա կրթությամբ Սամվել Սարգսյանը լինելով ֆիզիկապես առողջ, ազատված է զինվորական ծառայությունից: «Հոգեբուժարանի միջոցով,-պարզաբանեց ամբաստանյալը` պատասխանելով դատավոր Էդվարդ Մանուկյանի հարցին,-տարկետում ունեմ մինչեւ 2011 թ.-ը»: Մեղադրական եզրակացությունն ամբաստանյալը ստացել էր 2009թ-ի նոյեմբերի 17-ին: «Դուք համամիտ եք մեղադրական եզրակացության հետ»,-հարցրեց դատավորը: «Ես էդ հարցին չեմ պատասխանի,-կտրուկ հայտարարեց ամբաստանյալը,-ես կարծիք չունեմ»: Դատավորին զարմացրել էր, որ ամբաստանյալը որեւէ դիրքորոշում չունի իրեն առաջադրված մեղադրանքի նկատմամբ: «30 տարվա դատական պրակտիկայում առաջին անգամ է նման դեպքի հանդիպում»,-տարակուսեց դատավորը: Ի վերջո ամբաստանյալը խոստացավ դիրքորոշում հայտնել վկաների հարցաքննությունից հետո միայն: Դատարան հրավիրված 14 վկաներից փետրվարի 17-ի դատական նիստին ներկայացել էին չորսը: Դատարանում նախ վկայություն տվեց տուժողի իրավահաջորդը` Ջավահիր Սերոբյանը, ով մանրամասը պատմեց ապրիլի 15-ի եւ հետագա 11 օրերի դեպքերի մասին: Վկաներից խոսեցին մահացած տղայի ավագ եղբայրը` Արմեն Թադեւոսյանը, եւ հորեղբոր կինը` Անիչկա Թադեւոսյանը: Հարազատների վկայությամբ իրենք Տիգրանին շոկային վիճակում տարել են Անի թաղամասի ոստիկանությունից: Մեքենայի մեջ տղան պատմել է, որ իրեն ծեծել են եւ բողոքել գլխի ցավերից, ասելով որ հիմնականում գլխին են խփել ոտքերով: Մեկ օր Գյումրիի «Ճերմակ» հիվանդանոցում պառկեցնելուց հետո, ստանալով տոմոգրաֆի արդյունքները եւ տեսնելով, որ Տիգրանի վիճակը գնալով վատանում է, հարազատները ապրիլի 16-ին ժամը 21-ին շտապ տեղափոխել են Երեւան, Միքայելյանի հիվանդանոց, որտեղ էլ, ուշքի չգալով, ապրիլի 26-ին տղան մահացել է: Դեպքի օրը Տիգրանը հասցրել է ասել իրեն ծեծողների անունները` Սամվել, Սերգեյ, Էդգար եւ Վալերիկ: Նույն օրվա երեկոյան ավագ եղբայրը եւ եւս երեք հոգի հարազատներից մեքենայով գնացել են Սեւյան փողոց, որտեղ հանդիպել են ծեծի մասնակիցներին: Տղավարի զրույց է եղել, որի ժամանակ Տիգրանին ծեծելու հանգամանքը չի ժխտվել: Սամվելը պատճառաբանել է, որ Տիգրանը վիրավորել է սիրած աղջկան` Լիդա Եդիգարյանին: Երեւանում գտնված ժամանակ Տիգրանին այցելել են չորս տղաների ծնողները, գումար առաջարկել, որպես օգնություն: Այցի նպատակն է եղել նաեւ հասկանալ, թե ինչպիսի վտանգ կսպառանա իրենց զավակներին, եթե Տիգրանի հարազատները բողոքեն: Ջավահիր Սերոբյանը միայն ասել է, թե Աստված կանչեք, որպեսզի Տիգրանի գլխից մի մազ չպակասի, այլապես բոլորդ պատասխան եք տալու: Տիգրանի հարազատների հարցաքննության ժամանակ նիստը նախագահող դատավոր Էդվարդ Մանուկյանը նկատեց, որ եթե Թադեւոսյանները ժամանակին հայտարարություն տային, ապա ամբաստանյալի նստարանին կլինեին բոլոր չորս տղաներն էլ: Հրավիրված վկաների թվում էր նաեւ Տիգրան Թադեւոսյանի ուսուցչուհին, ում մոտ տղան եւ Լիդա Եդիգարյանը քիմիա են պարապել: Գոհար Պետրոսյանը Տիգրանին բնութագրեց որպես լրջախոհ, համեստ անձնավորության: «Տիգրանը շատ ընդունակ էր, եւ անգամ դեպքեր էր լինում, որ խնդիրը իմ կողմից բացատրելուց հետո, մի անգամ էլ ինքն էր բացատրում լավ չհասկացած աշակերտներին: Ես որեւէ թշնամական կամ արտառոց որեւէ վերաբերմունք չեմ տեսել Տիգրանի կողից Լիդայի հանդեպ, եւ դեպքի օրն էլ ամեն ինչ նորմալ է եղել»,-ասաց ուսուցչուհին: Որ եղել է ծեծկռտուք, ուսուցչուհին իմացել է միայն հաջորդ օրը, երբ Տիգրանը չի եկել պարապմունքի եւ ինքը զանգահարել է մորը` Ջավահիրին: Վերջինս էլ ասել է, որ Գոհարը այդ մասին կարող է տեղեկանալ Լիդայից: Ուսուցչուհու հարցերին պատասխանելիս Լիդա Եդիգարյանը պատմել է այն արտահայտության մասին, որ գրել էր Տիգրանը եւ որին կարդացել էր նաեւ իր ընկերն ու շատ զայրացել: Լիդան ժխտել է ծեծկռտուքի փաստը, պնդելով որ տղաներն ընդամենը զրուցել են: Ուսուցչուհու հետ զրույցից հետո Լիդան դադարեցրել է պարապմունքները եւ Գոհար Պետրոսյանն այլեւս ոչինչ չի կարողացել իմանալ դեպքի մասին: Դատական նիստի վերջին վկան Անի թաղամասի ոստիկանության բաժանմունքի աշխատակից Կորյուն Մարտիրոսյանն էր: Վերջինս պատմեց, որ ինքը ապրիլի 15-ին եղել է «վերակարգի»: Ժամը 17-ի մոտերքը դուրս է եկել շենքից դիմացի ցայտաղբյուրից ջուր խմելու: Նկատելով հարեւանությամբ գտնվող «Լիլիա» գեղեցկութայն սրահի մոտ հավաքված մարդկանց` մոտեցել է: Իմանալով, որ փողոցում ընկած մի տղայի տեղափոխել են սրահ, մտել է ներս եւ այնտեղ հանդիպել իրենց աշխատակիցներին: Այնուհետեւ իրենք Տիգրանին տեղափոխել են ոստիկանական բաժանմունք: «Դուք ինչ է, որեւէ բան էինք իմացել կամ նկատել, որ տղային տանում էինք բաժանմունք,-հարցրեց դատավորը: «Չէ, հեչ բան էլ չէի իմացել, սրահում հարցրեցի, տղան ասեց, որ ընկել է, մեկ էլ իմացանք որ շտապօգնություն են կանչել, իրան էլ տարանք մեր մոտ որ առաջին օգնություն ցույց տային»: Դատավոր Էդվարդ Մանուկյանը նկատեց, որ առանց հիմքի ոստիկանը իրավունք չուներ տղային բաժանմունք տանելու, որովհետեւ բժկական օգնություն Տիգրանին կարող էին ցույց տալ նաեւ սրահում: Իսկ եթե դա արել է, որովհետեւ դեպք է տեղի ունեցել, ապա պիտի բարի լիներ արձանագրեր այդ դեպքը, մի բան որ չի արել: «Վկա, գուցե այդ տղային ընդհանրապես չէր կարելի տեղից շարժել, ինչպե՞ս կարող էիք առանց բուժքույրի զննության կամ թույլտվաության նրան տեղաժարժել»: «Մյուս անգամ էլ չեմ տանի, սխալվել եմ, որ տարել եմ,-որեւէ խելամիտ պատասխան չգտնելով դատավորի հարցին` արդարացավ վկան: Հաջորդ դատական նիստն եւս կշարունակվի վկաների հարցաքննությամբ, քանի որ դատակոչված 14 վկաներից միայն 4-ն էին ներկայացել փետրվար 17-ին: