Տեսանյութեր
Լուսանկարներ
«Լրացուցիչ հնարավորություններ` սփյուռքում հայերենի պահպանության եւ տարածման համար»
Նախագահ Սերժ Սարգսյանն այսօր ընդունել է ինտերնետային բազմալեզու օնլայն թարգմանիչ ծրագրի աշխատանքային խմբին, որը համագործակցում է ՀՀ սփյուռքի նախարարության հետ:
Ծրագիրն ապահովում է արեւելահայերենից արեւմտահայերեն, արեւմտահայերենից արեւելահայերեն, երկու հայերեններից անգլերեն եւ հակառակ ուղղությամբ թարգմանություններ:
Նախագահի մամլո գրասենյակի փոխանցմամբ` Ս. Սարգսյանը գոհունակություն է հայտնել նման ծրագիր նախաձեռնելու կապակցությամբ եւ նշել, որ այդպիսով նաեւ լրացուցիչ հնարավորություններ են ստեղծվում սփյուռքում հայերենի պահպանության եւ տարածման համար:
Խմբի ղեկավար, տեխնիկական գիտությունների դոկտոր, պրոֆեսոր Էդուարդ Մանուկյանը նախագահին է ներկայացրել ծրագիրը, դրա ընդլայնման, կատարելագործման եւ կիրառման հեռանկարները: Նա տեղեկացրել է, որ նոր մեկնարկած ծրագրի կայքից արդեն իսկ օրական մոտ 1300 այցելու է օգտվում, որոնց զգալի մասը սփյուռքից է:
Խոսվել է ծրագրի աշխատանքային խմբում Հայաստանից եւ սփյուռքից բարձրակարգ լեզվաբաններ ընդգրկելուն, ծրագրի հետագա կատարելագործման համար գիտաժողով կազմակերպելուն վերաբերող հարցերի մասին:
Ս. Սարգսյանը հաջողություն է մաղթել աշխատանքային խմբի անդամներին եւ ասել, որ անհրաժեշտության դեպքում պատրաստ է օժանդակել նրանց գործունեությանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել