Այսօր Ժողովրդական արվեստի թանգարանում բացվեց լուսանկարիչ Հանրի Ներսիսյանի «Թումանյանական աշխարհը» խորագիրը կրող լուսանկարների անհատական ցուցահանդեսը, որի կազմակերպիչն էր «Լոռվա ձոր» Հ/Կ-ը: Ներկայացված աշխատանքներում պատկերված է Լոռվա բնությունը, մարդիկ` իրենց առօրյա հոգսերով, կիսավեր հուշակոթողները... «Լուսանկարներն արել եմ վերջին 5 տարվա ընթացքում: Սա իմ ծննադավայրն է, այս լուսանկարները ոչ թե ցուցահանդեսի համար եմ արել, այլ դրանք եղել են իմ արխիվում: Ես ընտրեցի այն նկարները, որոնք ներկայացնում են Թումանյանական աշխարհը»,- ասաց Հանրի Ներսիսյանը: Նրա ասելով ցուցահանդեսի նպատակն է ոչ միայն ներկայացնել Թումանյանի ծննդավայրը, այլեւ վեր հանել Լոռիում առկա խնդիրները. «Գրեթե բոլոր գյուղերում կարելի է տեսնել բնության աղավաղված վիճակ: Նույնն է թե ճանապարհների, թե հուշակոթողների հետ, ոչինչ չի արվում դրանք կործանումից փրկելու համար: Այս նույն վիճակն է ողջ Հայաստանում»,- ասաց լուսանկարիչը: Ցուցահանդեսին ներկա էր նաեւ Թումանյանի թոռնուհին` Իռմա Սաֆրազբեկյանը.  «Հանրի Ներսիսյանը կարողացել է քայլել այն վայրերով, որտեղով Թումանյանն է քայլել եւ կարողացել է տեսնել Լոռին հենց Թումանյանի աչքերով: Թումանյանն ինքն էլ շատ էր սիրում լուսանկարել: Կարծում եմ`  միշտ պետք է նման ցուցահանդեսներ ունենանք եւ աշխատենք, որ հատկապես երիտասարդությունը այցելի ցուցահանդեսների, որպեսզի նրանք սիրեն բնությունը, մոտ լինեն բնությանը»,- ասաց նա` նշելով, որ ցուցահանդեսին երիտասարդների ներկայությունն իրեն  ուրախացնում է: Իսկ ահա ցուցահանդեսի երիտասարդ այցելուներից Տիգրան Գրիգորյանն ասաց.   «Այստեղ բարձրացված են նաեւ այն խնդիրները, որոնք ոչ հոգատար վերաբերմունքի արդյունք են: Այս վերաբերմունքն արդարացված չէ, Լոռին համազգային արժեք է, պետք է փորձել լուծել այնտեղ առկա խնդիրները: Եւ այդ խնդիրները լուծելու ձեւերից մեկն էլ այս ցուցահանդեսն է»: Մարիամ Մուղդուսյան