Այսօր «Ալբերտ եւ Թովէ Բոյաջյան» ցուցասրահում բացվեց գեղանկարիչ Սարգիս Մուրադյանի աշխատանքների անհատական ցուցահանդեսը: Ցուցահանդեսի բացմանը իր խոսքում ԵԳՊԱ ռեկտոր, Արվեստի վաստակավոր գործիչ Արամ Իսաբեկյանն ասաց, որ ցուցահանդեսի բացումը ԵԳՊԱ-ի ցուցասրահում կարեւոր է հատկապես ուսանողների համար. «Գեղարվեստի ակադեմիան Սարգիս Մուրադյանի 2-րդ տունն էր: Նա այստեղ սովորել է, ապա` դասավանդել, եւ ես վստահ եմ, որ նրա կյանքի լավագույն օրերից շատերը կապված են ԳԱ-ի հետ»,- ասաց Արամ Իսաբեկյանը: Ներկայացված աշխատանքները հիմնականում ճանապարհորդությունների  ընթացքում եւ տարբեր ժամանակահատվածներում  արված էտյուդներ են, ճեպանկարներ, էսքիզներ… Ցուցահանդեսը կազմակերպվել է նկարչի  դուստրերի` Զարուհի եւ Գոհար Մուրադյանների ջանքերով եւ նվիրված է նկարչի հիշատակին: Նրանց խոսքերով` ներկայացված են նկարչի ոչ այնքան հայտնի գործերը. «Շատ գործեր նույնիսկ մեզ համար էին գաղտնիք: Մենք չգիտեինք դրանց գոյության մասին: Այս առումով սա իրոք նորություն էր մեզ համար: Այսօր առաջին անգամ ներկայացված են նրա աշխատանքները, որոնք երբեւէ չեն ցուցադրվել»,- ասաց Գոհար Մուրադյանը: Նրա խոսքերով` այս ցուցահանդեսը կարեւոր է հատկապես ուսանողների համար, քանի որ նրանք կարող են այցելել, դիտել եւ օգուտ քաղել ներկայացված աշխատանքներից: Նշենք, որ ցուցահանդեսն այցելուների համար  բաց կլինի մինչեւ մարտի տասը: Մարիամ Մուղդուսյան