Աբխազիայի հայերին փորձում են տեղահանել Երեկ տագնապալի լուրեր էին գալիս Աբխազիայից, որտեղ մենք պատկառելի հայ համայնք ունենք, որը կազմում է տեղի բնակչության 30 տոկոսից ավելին: Վերջին օրերին խիստ մեծացել են ճնշումներն այնտեղ մնացած հայերի նկատմամբ: Արդեն իսկ նրանց տեղահանման փորձեր են անում: Աբխազները ռուսների դրդմամբ պահանջում են հայերից, որ Հայաստանը ճանաչի Աբխազիայի անկախությունը, հակառակ դեպքում հայերին չեն թողնի բնակվել այնտեղ, որտեղ համշենահայերի բնակությունը թվագրվում է գրեթե մեկ դարից ավելի, և որտեղ հայերը հայտնի են որպես օրինապահ քաղաքացիներ և աբխազական քաղաքականությունը պաշտպանողներ: «Հրապարակը» տեղեկացավ, որ այս ճնշումների մասին տեղեկատվությունը արդեն իսկ պաշտոնական և ոչ պաշտոնական խողովակներով հասել է մեր իշխանություններին, սակայն նրանք հապաղում են որևէ բան ձեռնարկել, քանի որ ցանկացած քայլ կարող է վատ ընդունվել վրացական իշխանությունների կողմից և բարդացնել ջավախահայության վիճակը: Անգամ խուսափում են որևէ պատվիրակություն Աբխազիա ուղարկելուց, մերոնք հույս ունեն, որ վիճակ ինքնիրեն կշտկվի: Մի դիմում էլ դու գրի Արձագանքելով ՀՀԿ խմբակցության ղեկավար Գալուստ Սահակյանի պատրաստակամությանը` իր տունը փոխանակել ցանկացած ընդդիմադրի տան հետ` «Ժառանգության» պատգամավոր Զարուհի Փոստանջյանն «Առավոտին» ասաց. «Ճիշտն ասած, տեղյակ չէի, որ Գալուստ Սահակյանը սոցիալապես անապահով վիճակում է: «Ժառանգության» խմբակցությանը սոցիալապես անապահով բազմաթիվ քաղաքացիներ են դիմում` բնակարանի խնդիրներով: Այդ դիմումներն ուղարկում ենք կառավարությանը, որն ունի հատուկ ծրագիր, որտեղ հերթի են դրվում նման քաղաքացիները` պետբյուջեի հաշվին անվճար բնակտարածություն ստանալու համար: Եթե Գալուստ Սահակյանը նման խնդիր ունի, թող նման մի դիմում էլ նա գրի մեզ»: Ավելի ստոր բան դժվար է պատկերացնել Ռոբերտ Քոչարյանին «Հաագա ուղարկելու» ՀՀՇ-ական պաթոլոգիայի նախագարնանային սրացման մասին ի՞նչ կասեք: Պատասխանելով «Հայոց աշխարհի» այս հարցին` Էդուարդ Շարմազանովը երեկ նշեց. «Դա ուղղակի անհեթեթություն է: Ավելի ստոր բան դժվար է պատկերացնել. եթե Հայաստանի նախկին նախագահներից որևէ մեկը պետք է Հաագայի դատարանի առաջ կանգնի, ապա դա հաստատ Ռոբերտ Քոչարյանը չէ: Ժամանակին ադրբեջանցիներն էին սպառնում դատի տալ ղարաբաղյան շարժման ղեկավարներից մեկին` Ռոբերտ Քոչարյանին, այսօր նույն բանը իրենք են կրկնում: Ամոթ է: Չի կարելի այդքան կուրացած լինել ատելությամբ և չարությամբ, չի կարելի: Այդ ստոր «նախաձեռնությունը» լավագույնս խոսում է իրենց` նախաձեռնողների մասին»: Կարող է դատվեն Երեկ ՀՀ Սահմանադրական դատարանը իր որոշմամբ ամրագրել է, որ անցած տարի ՀՀ վճռաբեկ դատարանի քաղաքացիական և վարչական պալատը «Ա1+»-ի գործը քննելիս կիրառել է հակասահմանադրական և օրենքի ուժ չունեցող դրույթ: Այսպես, 2008 թ. սեպտեմբերին ուժի մեջ մտավ Եվրադատարանի վճիռը, ըստ որի` «Ա1+»-ին եթերազրկելու վերաբերյալ 2003-ին և 2004-ին Հայաստանում կայացված դատակավ վճիռներով ՀԸ-ի իրավունքները խախտված են համարվել: Հիմք ընդունելով ԵԴ վճիռը` «Ա1+»-ը դիմել էր ՀՀ վճռաբեկ դատարան` պահանջելով բեկանել այդ վճիռները: Սակայն Վճռաբեկ դատարանը 2009-ի փետրվարին հրաժարվել էր դրանք բեկանելուց` որպես հիմք ընդունելով ՀՀ քաղաքացիական օրենսգրքի 204.28 հոդվածը, որը դեռ 2008-ի ապրիլին ճանաչվել էր հակասահմանադրական: Հենց սա էլ երեկ արձանագրել է ՍԴ-ն: Փաստորեն ՀՀ վճռաբեկ դատարանի նախագահ Ա. Մկրտումյանը, Վճռաբեկի քաղաքացիական և վարչական պալատի նախագահ Ս. Սարգսյանը, նույն պալատի անդամ 9 դատավորները կարող են քրեական պատասխանատվության ենթարկվել` ակնհայտ անարդար դատական ակտ կայացնելու համար: Ամենաանհեթեթ բացատրությունը գտնվեց «Ես անթույլատրելի կհամարեի որևէ մեկին բացահայտել դրդապատճառները, թե ինչու և որ իրավիճակներում է բանակը բերվում մոբիլիզացիայի»,- անդրադառնալով մարտի 1-ի դեպքերին` հայտարարել է Դավիթ Հարությունյանը: «ՉԻ» - Հասկացա՞ք, թե ինչ է ասում: Ուզում է ասել, որ երևի բանակի հետախուզությունը տվյալներ է ունեցել, որ մարտի 3-4-ին ադրբեջանցիները Մարտակերտի ուղղությամբ հարձակվելու են, դրա համար էլ դեռևս փետրվարի 23-ին բանակը մոբիլիզացրել են, զորքերը բերել Երևան և այլն: Մի խոսքով, ուզում է ասել` «ձեր ի՞նչ գործն է, թե բանակն ինչով է զբաղվում, դա ռազմական գաղտնիք է և հրապարակման ենթակա չէ»: Ստացվում է, որ ցանկացած պահի բանակը կարող է, ասենք, Երևանի կենտրոնում կրակել ցուցարարների վրա կամ որևէ սուպերմարկետ թալանել ու հետո պարզաբանել, թե այդ ամենն արել է «հետախուզական տվյալների հիման վրա, որոնք հրապարկման ենթակա չեն»: Ի դեպ, անհասկանալի է մնում, թե այդ դեպքում ինչո՞ւ փետրվարի 23-ի հրամանի նման մի հրաման էլ Ղարաբաղի պաշտպանության նախարարը չի արձակել: Մեր հաղթանակները. այս մասին հարկավոր է և անհրաժեշտ է խոսել Չորս հատոր աշխատություն, 200 ռազմական հաղթանակի նկարագրություն և հստակ նպատակ` այդ աշխատության միջոցով նպաստել տեղեկատվական անվտանգությանը: «Նորավանք» գիտակրթական հիմնադրամը և ռազմարվեստի պատմաբան Սուրեն Մարտիկյանի գլխավորած հեղինակային խումբը նախաձեռնել և արդեն հրատարակել են «Մեր հաղթանակները» աշխատության երկրորդ հատորը: Մինչև հաջորդ տարվա սկիզբ կտպագրվեն նաև մյուս երկու հատորները` այսպիսով ավարտելով մինչև 21-րդ դարը հայ ժողովրդի 200 հաղթանակների ամբողջական նկարագրությունը: «Յուրաքանչյուր հասարակություն տեղեկատվական պատերազմի ակտիվ մասնակից է, և այս պատերազմում հաջողության հասնում է այն կողմը, որը չի տառապում բարդույթներով, հստակ գնահատական ունի սեփական հաղթանակների ու պարտությունների նկատմամբ: Մեր հասարակությունը թերարժեքության բարդույթ ունի, մենք համոզված ենք, որ մեզ շարունակ կոտորել են: Հայությունը շատ հաղթանակներ է ունեցել, որոնք պետք է ներկայացնել` այսպիսով նպաստելով նաև հասարակության հոգեբանական անվտանգության կազմավորմանը»,- «Հենարան» մամուլի ակումբում լրագրողների հետ հանդիպմանը նշեց «Նորավանք» հիմնադրամի տնօրեն Գագիկ Հարությունյանը: