«Ժառանգություն» կուսակցությունն այսօր մամլո հաղորդագրություն է տարածել, որում մասնավորապես ասվում է. ««Ժառանգություն» կուսակցության առաջնորդ Րաֆֆի Հովհաննիսյանը եւ խմբակցության քարտուղար Լարիսա Ալավերդյանը փետրվարի 28-ից մարտի 2-ը ԱՄՆ մայրաքաղաք Վաշինգտոնում կմասնակցեն Policy Forum Armenia-ի տարեկան երկրորդ համաժողովին, որը նվիրված է Հայաստան-Սփյուռք հարաբերություններին: Այդ հեղինակավոր եւ աննախադեպ համաժողովի թեման Հայաստանի եւ Սփյուռքի փոխներգրավվածության ապահովումն է Հայաստանի ժողովրդավարացման, հայ-թուրքական արձանագրությունների, տնտեսական ոլորտի, կառավարման եւ համակարգային բարեփոխումների խնդիրներում: PFA-ի  հրավերով Ջորջթաուն համալսարանում մարտի 1-ին Համաժողովի մասնակիցների առջեւ հատուկ ուղերձով եւ վերոնշյալ խնդիրների մասին ծրագրային զեկույցով հանդես կգա «Ժառանգություն» կուսակցության հիմնադիր, ՀՀ նորանկախ պետության առաջին արտգործնախարար Րաֆֆի Հովհաննիսյանը: Ելույթով հանդես կգա նաեւ «Ժառանգություն» խմբակցության քարտուղար Լարիսա Ալավերդյանը, ով անմիջապես համաժողովին կմիանա Մեծ Բրիտանիա կատարած իր այցելությունից հետո: Համաժողովին իրենց մասնակցությունն են բերելու Հայաստանում, ԱՄՆ-ում եւ Եվրոպայում հասարակական, հետազոտական կազմակերպությունների ներկայացուցիչներ, համալսարանականներ, մտավորականներ, դիվանագետներ եւ միջազգային գիտական հեղինակություններ, նրանց թվում` աշխարհահռչակ հայ պատմաբան Ռիչարդ Հովհաննիսյանը: Համաժողովի  առաջին օրը` փետրվարի 28-ին, Վաշինգտոնի բարձրակարգ ընդունելությունների Cosmos ակումբում PFA-ն կներկայացնի «Հայաստան-Սփյուռք հարաբերություններ. Անկախությունից 20 տարի անց» զեկույցը»: