Իտալիայի Միլան քաղաքում այս ամսվա ընթացքում կայացած միջազգային զբոսաշրջային ցուցահանդեսին Ղարաբաղի մասնակցությանն էր նվիրված ԼՂՀ կառավարությանն առընթեր զբոսաշրջության վարչության պետ Սերգեյ Շահվերդյանի այսօրվա մամուլի ասուլիսը: Ցուցահանդեսը, ըստ Սերգեյ Շահվերդյանի, ամենահանգիստն էր բոլոր ցուցահանդեսների համեմատ, քանի որ խնդիրներ չեղան ոչ կազմակերպիչների, ոչ էլ Իտալիայի արտգործնախարարության հետ:

Այսպես սովորաբար լինում էր միջազգային ցուցահանդեսների ժամանակ, որոնց Ղարաբաղի մասնակցությանն ամեն կերպ փարձում է խոչընդոտել Ադրբեջանը` լրատվամիջոցներով բարձրացնելով նաեւ մեծ հիստերիա: «Այժմ այդ հիստերիային ոչ մենք ենք ուշադրություն դարձնում, ոչ էլ ցուցահանդեսների կազմակերպիչները»,- շեշտել է զբոսաշրջության վարչության պետը:

Նրա հավաստմամբ` այժմ որեւէ երկրում նմանատիպ խնդիրներ չեն ունենում, բացի Հայաստանի ռազմավարական գործընկեր համարվող Ռուսաստանից: Ղարաբաղի մասնակցությունն  այս անգամ ապահովվել է միայն  պետական միջոցների հաշվին. այդ նպատակով հատկացվել է շուրջ 9 մլն դրամ: Ասուլիսի ժամանակ զբոսաշրջության վարչության պետը նշեց Միլանի ցուցահանդեսի առանձնահատկությունների մասին:

Առաջինն այն էր, որ հայկական երկու պետությունններից այս անգամ միայն Ղարաբաղն էր մասնակցում միջոցառմանը, ուստի Ղարաբաղի պատվիրակությունը պետք է ներկայացներ ոչ միայն Արցախը, այլ նաեւ Հայաստանը, քանի որ, ըստ Ս.Շահվերդյանի, Ղարաբաղի զբոսաշրջությունը հենց Հայաստանի զբոսաշրջության մի մասն է համարվում:

Երկրորդ առանձնահատկությունն  այն էր, որ Ղարաբաղի պատվիրակությունը, ի տարբերություն մյուս ցուցահանդեսների, մեծ ջանքեր չգործադրեց այցելուներին բացատրելու, թե ինչ է Ղարաբաղը:

«Բոլոր այցելուներն էլ տեղյակ էին Ղարաբաղի մասին, եւ բացատրելու կարիք չկար»,-ավելացրել է նա: Ցուցահանդեսը մյուսներից տարբերվում էր նաեւ Ղարաբաղի տաղավարի այցելուների աննախադեպ թվով ու նրանց ցուցաբերած հետաքրքրությամբ: Միլանի ցուցահանդեսն այս տարվա երկրորդ ցուցահանդեսն էր: Առաջինը փետրվարի 13-15-ը ԱՄՆ Լոս Անջելես քաղաքում կազմակերպված ցուցահանդեսն էր, որին Ղարաբաղը մասնակցել  է հեռակա կարգով: Արցախը լիազորվել է ներկայացնել ԱՄՆ-ում գործող «Ավանդ» ընկերությունը, որն, ի դեպ, մեծ ներդրումներ է կատարում Շուշիում: