Փոխվարչապետ, տարածքային կառավարման նախարար Արմեն Գեւորգյանը քաղաքաշինության նախարար Վ. Վարդանյանի, տրանսպորտի եւ կապի նախարար Գ. Սարգսյանի, արտակարգ իրավիճակների նախարար Մ. Շահգելդյանի եւ Տավուշի մարզպետ Ա. Ղուլարյանի հետ նախօրեին այցելել է Տավուշի մարզի սողանքային վայրեր: Փոխվարչապետն ու նախարարները եղել են Մ4 մայրուղու 114 կմ-ի հատվածում` Հովք համայնքի տարածքում, որտեղ սողանքը սպառնում է մայրուղու անվտանգությանը, ինչպես նաեւ Դիլիջան քաղաքի երկու սողանքային հատվածներում, որոնցից մեկը մայրուղու հարակից տարածքում է եւ կարող է մայրուղու փլուզման պատճառ դառնալ: Դիտարկվել է նաեւ Հաղարծին համայնքի սողանքային գոտին: Ինչպես հայտնում են տարածքային կառավարման նախարարության մամլո գրասենյակից, Տավուշի մարզպետարանում փոխվարչապետի գլխավորությամբ անցկացված խորհրդակցության ընթացքում Մ4 մայրուղու վերոնշյալ հատվածի առումով Քաղաքաշինության նախարարությանը հանձնարարվել է Տրանսպորտի եւ կապի նախարարության հետ համատեղ գեոդեզիական ուսումնասիրություն իրականացնել` հաշվի առնելով տեղանքի բարդությունները, ու նախկինում կատարված ուսումնասիրությունները եւ ներկայացնել առաջարկություն` ճանապարհի անցանելիությունը թեկուզ ժամանակավոր անխափան ապահովելու վերաբերյալ: Դիլիջան քաղաքում առկա սողանքային հատվածների վերաբերյալ խորհրդակցության ժամանակ եւս հանձնարարվել է Քաղաքաշինության նախարարությանը Տրանսպորտի եւ կապի նախարարության հետ համատեղ ռիսկերի գնահատման ուսումնասիրություն իրականացնել ու հնարավոր կանխարգելիչ միջոցառումների ծրագիր ներկայացնել: Արտակարգ իրավիճակների նախարարության կողմից առաջարկվել է այդ գործընթացում ներգրավել նաեւ GTZ կազմակերպությանը` հաշվի առնելով այն հանգամանքը, որ կազմակերպության կողմից նմանատիպ ծրագրեր իրականացվում են: Հաղարծին համայնքում սողանքի հետեւանքով անօթեւան մնացած ընտանիքները վերաբնակեցվել են Իջեւան-Հրազդան երկաթգծի 67-րդ կմ-ի հատվածում, սակայն վեց ընտանիք դեռեւս բնակարանային ապահովվածության խնդիր ունի, որոնցից 4 ընտանիքի վերաբնակեցումն առավել հրատապ է: Խորհրդակցության ժամանակ որոշվել է, որ Քաղաքաշինության նախարարությունը մարզպետի եւ համայնքի ղեկավարի հետ կքննարկի ԲԳՎ-ների տրամադրման հարցը եւ առաջիկա մեկ ամսվա ընթացքում առաջարկություն կներկայացնի կառավարությանը: Խորհրդակցության ընթացքում ներկայացվել են նաեւ Վազաշեն համայնքի սողանքային հոսքի վտանգները: Ներկայումս սողանքային հոսքերն առավել վտանգավոր են մի քանի բնակելի տների համար: Հաշվի առնելով մասնագետների նախնական կարծիքը` փոխվարչապետը հանձնարարել է Քաղաքաշինության նախարարությանը գեոդեզիական ուսումնասիրություն իրականացնել` ռիսկերի գնահատման համար եւ հրատապ վերաբնակեցման կարիք ունեցող ընտանիքների վերաբերյալ սեղմ ժամկետներում առաջարկություններ ներկայացնել: Այցի ընթացքում փոխվարչապետը մասնակցել է նաեւ Տավուշի մարզպետարանի եւ «Հայաստանի երիտասարդ իրավաբանների ասոցիացիայի» միջեւ համատեղ հակակոռուպցիոն աշխատանքների իրականացման մասին փոխըմբռնման հուշագրի ստորագրման արարողությանը: Համաձայն հուշագրի` խորհրդատվական աշխատանքներ է իրականացնելու «Շահերի պաշտպանության եւ աջակցության կենտրոնը», որը ֆինանսավորվում է ԱՄՆ ՄԶԳ կողմից: