ՀՀ ԱԺ պատգամավորը, եթե որևէ այլ երկրում ցանկանա կարդալ ԱԺ էլեկտրոնային փոստարկղի իր նամակները, ապա նրա նամակները կարող են կարդալ նաև թուրքական, վրացական կամ որեւէ այլ երկրի ազգային անվտանգության ծառայության ներկայացուցիչները: Այսօր տեղեկատվական տեխնոլոգիաների լիդերների առանց փողկապի հանդիպման ժամանակ այս վտանգը ներկայացրեց «Ապագա Թեքնոլոջիս» ընկերության ներկայացուցիչ Հայկ Ասրիյանցն` անդրադառնալով էլեկտրոնային կառավարման անվտանգության խնդիրներին: Նրա խոսքերով` դրա հավանականությունը մեծ է հատկապես այն երկրներում, որտեղից Հայաստանն ինտերնետ է ստանում կամ որի միջով անցնում է Հայաստան մտնող մալուխը: Նույն վտանգը սպառնում է նաև պետական համակարգի այլ կառույցներին, ինչպես, ասենք, Կենտրոնական բանկին և այլն: «Երբ տվյալները փոխանակվում են ինտերնետով և դրանք կոդավորված չեն, սերվերի և օգտագործողի միջև շղթայով գտնվող ցանկացած այլ սերվեր կարող է մուտք ստանալ այդ տվյալներին»,- «Հետքի» հետ զրույցում ասաց Հայկ Ասրիյանցը: Նրա մատուցմամբ` այսօր Հայաստանում կա էլեկտրոնային կառավարման մշակույթի բացակայություն, բայց բացն արդեն լրացվում է: Օրինակ` կոդավորման համակարգից օգտվում է ՀՀ արտաքին գործերի նախարարությունը, Կառավարությունը, մասնավոր բանկերը, «ՎիվաՍելը» և այլ հաստատություններ: Կան նաև ներքին ռիսկեր, նույն կերպ կարելի է հենց Հայաստանից մուտք ստանալ տվյալ համակարգի տվյալներին, սակայն, ըստ մասնագետի,  ռիսկայնություն ավելի բարձր է ինտերնետ ստանալու ճանապրհներին: Իսկ եթե համակարգը կոդավորած է, ապա նման ռիսկերից կարելի է զերծ մնալ: Հայկական ձեռնարկություններին կոդավորման սերտիֆիկատ Հայկ Ասրիյանցի ներկայացրած ընկերությունն էլ է տրամադրում: Այս ծառայությունը ընկերությունը  մատուցում է 2 տարվա համար 3095 ԱՄՆ դոլարով: Տվյալների կոդավորումը անվճար էլ կարելի է անել, եթե կա համապատասխան մասնագետ: Այստեղ մասնագետն ընդգծեց հաստատությունների` անվտանգության և կոդավորման մասին տեղեկացված չլինելու փաստը և համապատասխան փորձառու մասնագետների պակասը: