«Հետք» թերթի գլխավոր խմբագիր Էդիկ Բաղդասարյանն այսօր «Ուրբաթ» ակումբում, անդրադառնալով դեղին մամուլին, նշեց, որ լավ է, որ ամեն տեսակի մամուլ կա: «Աշխարհի բոլոր երկրներում էլ կա դեղին մամուլ, և դա նորմալ է: Շատ է խոսվում, որ որոշ թերթերում էթիկայի խախտում կա: Բայց էթիկայի խախտում կա նաև Մեծ Բրիտանիայում, Ֆրանսիայում և Ամերիկայում, և երբեք դա պետության կարևորագույն խնդիրը չի դառնում:

Թողնում են` այդ մարդիկ հանգիստ իրենց գործն անեն: Այդ թերթերն ընթերցողներ ունեն: Եթե այդ կարգի մամուլի պահանջարկ կա, ուրեմն պետք է նաև դա լինի»,- ասաց նա: Խոսելով լրագրողների` տեղեկատվություն ստանալու խնդրից` Է. Բաղդասարյանն ասաց, որ ընդհանուր պատասխան ստանալը հեշտ է, դժվար է կոնկրետ հարցի պատասխան ստանալը: «Հաճախ մենք ստանում ենք պատասխանն ու ստիպված այդ պատասխանի հիման վրա նորից հարցում ենք ուղարկում. աբսուրդ վիճակ է: Ընդհանրապես, մեր բոլոր կառույցները փակ են, երբ տալիս ես կոնկրետ հարցեր: Օրինակ, պետեկամուտների ամանորյա նվերների հետ կապված` իրականում ամենամեծ խնդիրը շարունակությունն էր, թե որտեղից են 1 միլիոն դրամով ժամացույցներ գնել, մթերքներ և այլն: Ովքե՞ր են եղել այն մարդիկ, ովքեր մեկ միլիոն դրամանոց ժամացույցով են պարգևատրվել: Ու երբ դու սկսում ես այդ հարցերը տալ, պատասխան չես ստանում»,- ասաց նա: «Հետքի» խմբագրի խոսքով` Հայաստանում ամեն ինչի համար պետք է քաղաքական որոշում կայացնել: Խոսելով լրագրողների նկատմամբ իրականացված բնությունների առթիվ հարուցված գործերի մասին` Է. Բաղսադարյանը նշեց, որ քաղաքական պատվեր չի լինում, որ որևէ գործ բացահայտվի: «Երբ շփվում ես ընդհանրապես քրեական գործերի հետ, երբ սկսում ես ուսումնասիրել դրանք, հանդիպում ես ոչ պրոֆեսիոնալիզմի: Նախաքննության ընթացքում այնպիսի սխալներ են անում, որոնք հետո նույնիսկ դատարանում չես կարող վերականգնել, օրինակ` տեղանքի զննում, մատնահետքեր և այլն: Ոչնչի վրա ուշադրություն չեն դարձնում»,- ասաց «Հետքի» խմբագիրը: Է. Բաղդասարյանի խոսքերով` իր համար ժուռնալիստի իրավունքն ավելի բարձր չէ, քան որևէ գյուղացու իրավունքը: Բոլոր մարդիկ հավասար են: Ընդհակառակը, խմբագրի կարծիքով` ժուռնալիստներն ավելի արտոնյալ վիճակում են, քանի որ կարողանում են գոնե գրել և իրենց պաշտպանել: «Բայց այսօր մարզերում բազմաթիվ մարդկանց են խոշտանգում, որոնց մասին մենք կարող է իմանանք, կարող է` ընդհանրապես չիմանանք կամ իմանանք մի քանի ամիս հետո: Մարդու իրավունքներն են Հայաստանում վատ վիճակում, ինչո՞ւ պետք է լրագրողներին առանձնացնել»,- ասաց նա` նշելով, որ իրականում լրագրողներով ավելի շատ են զբաղվում, քան մնացածներով: