Այսօր արտգործնախարար Էդվարդ Նալբանդյանը հանդիպել է Չեխիայի Հանրապետության Խորհրդարանի Պատգամավորների պալատի փոխնախագահ Վոյցեկ Ֆիլիպին (Vojteck Filip): ԱԳՆ մամլո ծառայության փոխանցմամբ` Է. Նալբանդյանն ասել է,  որ Չեխիայի հետ հարաբերությունները վերջին շրջանում բավականին ինտենսիվ զարգանում են եւ դրանք առավել խորացնելու նպատակով որոշում է կայացվել Պրահայում Հայաստանի դեսպանություն հիմնելու մասին: Զրուցակիցներն անդրադարձել են հայ-չեխական հարաբերությունների հետագա ամրապնդման ուղղությամբ ձեռնարկվելիք համատեղ քայլերին` կարեւորելով բարձրաստիճան այցերի կազմակերպումը, միջխորհրդարանական համագործակցության ակտիվացումը, տնտեսական համագործակցության եւ մշակութային փոխանակումների խթանումը: Երկուստեք կարեւորվել է առաջիկայում Չեխիայի վարչապետի Հայաստան կատարելիք այցելությունը: Էդվարդ  Նալբանդյանն ու Վոյցեկ Ֆիլիպը մտքեր են փոխանակել մի շարք տարածաշրջանային հարցերի շուրջ: