«Միասնական Ջավախ» ժողովրդավարական դաշինքի առաջնորդ Վահագն Չախալյանի պաշտպան Ստեփան Ոսկանյանը 2011թ. սեպտեմբերի 12-ին այցելե է իր պաշտպանյալին:

Հիշեցնենք, որ Վահագն Չախալյանը դատապարտվելով 10 տարվա ազատազրկման, ներկայումս պահվում է Վրաստանի Ռուսթավի N6 խիստ ռեժիմի գաղութի 106 բանտախցում:

«Այցելության ընթացքում Վահագն Չախալյանն ինձ տեղյակ է պահել, որ վերջին շրջանում վրացական իշխանությունները ուժեղացրել են իր նկատմամբ բանտային ճնշումները, այդ թվում` նաև բանտային պայմանների էական խստացման միջոցով:

Մասնավորապես,

1. Առգրավվել են Վահագն Չախալյանին պատկանող բոլոր գրքերը, դրանք վերադարձնելու դիմումները մնում են անպատասխան:

2. Վահագն Չախալյանի բանտախցում նախկինի համեմատ ավելի հաճախակի են դարձել ջրի անջատումները (երբեմն օրերով), միաժամանակ, նրան արգելվել է բանտախցում պահել ջրի համար բաքեր: Դա էապես դժվարացնում է բանտախցում տարրական հիգիենայի պահպանման հնարավորությունը:

3. Վահագն Չախալյանը ժամանակ առ ժամանակ զրկվում է բանտային խանութից գնումներ կատարելու հնարավորությունից:

4. Նախկինի համեմատ սահմանափակվել է Վահագն Չախալյանի` հեռախոսից օգտվելու հնարավորությունը. նրան օրերով թույլ չի տրվում օգտվել հեռախոսից, իսկ երբ նրան այնուամենայնիվ նման հնարավորություն տրվում է, ապա խոսելաժամանակը էապես սահմանափակվում է: Խոսակցությունների ընթացքում հաճախակի անջատում են հեռախոսակապը` հոսանք չլինելու անհիմն պատճառաբանությամբ:

5. Էապես սահմանափակված է մերձավոր ազգականների հետ տեսակցելու Վահագն Չախալյանի իրավունքը: Վահագն Չախալյանի ձերբակալությունից հետո անցած երեք տարի երկու ամիս ժամանակաշրջանում նրան միայն մեկ անգամ՝ 15 րոպե տևողությամբ անձնական տեսակցություն են թույլատրել կնոջ և որդու հետ (վրացական օրենսդրությամբ նախատեսվում է, որ բանտարկյալը նման տեսակցության իրավունք ունի 3-ից 6 ամիսը մեկ՝ մինչև 24 ժամ տևողությամբ):

6. Արհեստականորեն ձգձվում է Վահագն Չախալյանին տեսակցելու համար հայ հոգևորականներին թույլտվության տրամադրումը:

7. Նախկինի համեմատ աճել են Վահագն Չախալյանին ահաբեկելու փորձերը, նրա նկատմամբ տարբեր սպառնալիքներ են հնչեցվում ինչպես խցակիցների, այնպես էլ բանտի պահակազորի կողմից:

Վերոնշյալ խախտումների մասին նամակով տեղյակ եմ պահել Վրաստանի հանրային պաշտպան Գիորգի Տուգուշիին ՝ խնդրելով անմիջապես ձեռնարկել համապատասխան միջոցներ` Վահագն Չախալյանի նկատմամբ դրսևորվող խտրական վերաբերմունքը վերացնելու ուղղությամբ»,- տեղեկացնում է Ստեփան Ոսկանյանը: