Մայրաքաղաքի դպրոցների աշխատանքի ուսուցման կաբինետ-լաբորատորիաները  էլեկտրական աշխատանքային գործիքներով և սարքավորումներով համալրելու ծրագրին առնչվող հարցեր են քննարկվել Երևանի քաղաքապետ Կարեն Կարապետյանի և ՌԴ–ում ու ԱՊՀ երկրներում գերմանական «Bosch» ընկերության էլեկտրասարքավորումների վաճառքի գծով տարածաշրջանային տնօրեն Լուտց Մարշալի հանդիպման ընթացքում:

Նշելով, որ ընկերությունը աշխարհի տարբեր երկրներում նաև կրթական ոլորտում համագործակցության մեծ փորձ ունի, Լուտց Մարշալը ընկերության անունից Երևանում նմանատիպ, սակայն ավելի ընդգրկուն ծրագրի իրականացման պատրաստակամություն է հայտնել, հավելելով, որ համապատասխան աշխատանքային գործիքներով ու սարքավորումներով դպրոցները համալրելուց զատ՝ ընկերությունը պատրաստ է նաև ուսուցիչների վերապատրաստման դասընթացներ կազմակերպել:

Կարեն Կարապետյանը հյուրերին ներկայացրել է կրթության ոլորտում Երևանի քաղաքապետարանի կողմից իրականացվող ծրագրերը՝ շեշտելով դպրոցականների դաստիարակության գործում աշխատանքային հմտությունների զարգացման կարևորությունն ու անհրաժեշտությունը: «Մենք պատրաստ ենք համագործակցության, առավել ևս, եթե այդ համագործակցությունը օգուտ է  բերելու երեխաներին»,– նշել է Երևանի քաղաքապետը:

Կարեն Կարապետյանը հյուրերին  նաև ներկայացրել է քաղաքային տնտեսության այն ոլորտները, որոնք գործարար հետաքրքրություն կարող են ներկայացնել ընկերության համար:

Ձեռքբերված պայմանավորվածության համաձայն, հնարավոր այլ ոլորտներում համագործակցության հարցեր քննարկելու նպատակով՝ ընկերության ներկայացուցիչներն առաջիկայում կրկին կայցելեն քաղաքապետարան:

Երևանի քաղաքապետարանի տեղեկատվության և հասարակայնության հետ կապերի վարչություն