Ղարաբաղում մի շարք ապրանքատեսակների գներին զուգահեռ փոխվում են նաեւ կոմունալ եւ մի քանի այլ ծառայությունների մատուցման սակագները: Վերջերս ԼՂՀ հանրային ծառայությունները եւ տնտեսական մրցակցությունը կարգավորող պետական հանձնաժողովի բաց նիստում քննարկվել է խմելու ջրի մատակարարման եւ ջրահեռացման ծառայությունների մատուցման նոր սակագներ սահմանելու մասին որոշման նախագիծը:

Ծառայություններ մատուցող «Ջրմուղ-կոյուղի» ՓԲԸ-ն հանձնաժողով հայտ էր ներկայացրել` նոր սակագներ սահմանելու մասին: Ընկերության առաջարկությամբ խմելու ջրի մատակարարման ծառայության մատուցման համար կսահմանվի 100 դրամ (ներառյալ ավելացված արժեքի հարկը)` յուրաքանչյուր 1 խմ դիմաց (նախկինում գործող 52 դրամի փոխարեն), իսկ ջրահեռացման ծառայության մատուցման սակագինը` 12 դրամ (ներառյալ` ԱԱՀ, նախկինում գործող 4 դրամի փոխարեն):

«Ջրմուղկոյուղի» ընկերության տնօրեն Վլադիմիր Արզումանյանը սակագների բարձրացումը կապում է էլեկտրաէներգիայի սակագնի բարձրացման, ինչպես նաեւ ընկերության ծախսերի ավելացման հետ, ինչի արդյունքում, ըստ նրա, ընկերությունը վնասով է աշխատում: Տնօրենի խոսքերով` գործող սակագները ձեւավորվել են տարիներ առաջ, երբ էլեկտրաէներգիայի սակագինը 15 դրամ էր: Հիմա այն 25 դրամ է, ուստի, նրա հիմնավորմամբ, ջրի սակագինը նույնը մնալ չի կարող, քանի որ ջրամատակարարման համար ծախսվում է բավականաչափ էլեկտրաէներգիա: Ընկերությունը, Վ. Արզումանյանի հավաստմամբ, լուրջ ներդրումներ պետք է կատարի ջրի մաքրությունն ապահովելու համար. շուրջ 700 մլն դրամի ներդրումներ է նախատեսվում կատարել: Աշխատանքներ են կատարվում նաեւ Ստեփանակերտում շուրջօրյա ջրամատակարարում ապահովելու ուղղությամբ: Արդեն կան թաղամասեր, որոնք շուրջօրյա ջուր են ստանում:

«Մինչեւ մարտի 15-ը շահագործման կհանձնվի 7-րդ գոտին, որն ընդգրկում է մեկ թաղամաս եւ մի քանի փողոցներ: Այս տարի շահագործման կհանձնվի նաեւ 9-րդ գոտին: Այսպիսով, մինչեւ տարեվերջ շուրջօրյա ջուր կստանան Ստեփանակերտի 4 գոտիներում, իսկ 2 տարվա ընթացքում` քաղաքն ամբողջությամբ»,- նիստի ժամանակ նշեց ընկերության տնօրենը:

Նիստում սակագների բարձրացման վերաբերյալ իր վրդովմունքը հայտնեց պետական մարմինների աշխատողների արհմիությունների հանրապետական կազմակերպության նախագահ Յուրի Ավանեսյանը` շեշտելով, որ հասարակության կողմից բացասաբար է ընդունվելու սակագնի բարձրացումը, քանի որ կենսաթոշակները, աշխատավարձերը չեն բարձրացվել:

«Ինչո՞ւ ծախսերի փակումը կատարել ի հաշիվ ժողովրդի, որի մի մասն առանց այն էլ չի կարողանում վճարել ջրի վարձը, իսկ թանկացումից հետո ի՞նչ կլինի: Չի կարելի չարաշահել ժողովրդի համբերատարությունը: Մի՞թե հնարավոր չէ ընդունել միջին գին»,- հարցրեց նա, սակայն պատասխանը եղավ հանձնաժողովի կողմից որոշման նախագծի միաձայն ընդունումը: Նոր սակագները կգործեն մարտի 18-ից. կրկնակի կվճարեն ինչպես շուրջօրյա, այնպես էլ այլ գրաֆիկով ջուր ունեցողները: Հանձնաժողովի մեկ այլ որոշմամբ բարձրացվեց տրանսպորտային միջոցների պարտադիր տեխզննման սակագինը, իսկ ապրիլի 1-ից կբարձրանա նաեւ գազի սակագինը: Սակագների բարձրացումը հանրապետության բնակչության մի զգալի մասին դժվար կացության մեջ կդնի, քանի որ այդ ամենով չի վերջանում գների աճը. վերջերս արդեն բարձրացել է նաեւ մսի գինը` տավարի մսի 1 կգ-ն այժմ վաճառվում է 1800 դրամով` նախկին 1500 դրամի փոխարեն: Չի փոխվել խոզի մսի գինը` 1 կգ-ը 2600 դրամ է: Թանկացել են նաեւ որոշ դեղամիջոցներ: «Ստացվում է, որ ոչ պետք է հիվանդանանք, ոչ մրսենք, ոչ էլ նորմալ հաց ուտենք»,- կեսկատակ-կեսլուրջ նշեց Ստեփանակերտի բնակչուհի Սվետլանա Ավագյանը, ում միակ եկամուտը թոշակն է:

«Բալա ջան, ո՞նց պետք է ապրենք, չգիտեմ, իմ ու ամուսնուս թոշակը հազիվ հերիքում էր գազի, լույսի եւ մի կտոր չոր հացի համար, հիմա, երբ գազն ու ջուրն էլ թանկացրել են, չգիտեմ` ինչ ենք անելու: Ստացվում է, որ հացից պետք է կտրենք, այդ վճարումներն անենք, թե չէ` կգան գազն ու լույսը կանջատեն` կմնանք մթում ու ցրտում նստած»,- ասաց տիկին Սվետլանան:

«Ոչ հարցնում են, ոչ` մտածում, թե էս մարդիկ ոնց պիտի յոլա գնան: Բարձրացնում են հերիք չէ` դեռ չեն էլ ձգտում որակյալ սպասարկում իրականացնել: Ասում են` ջրի գինը բարձրանում է: Բա նորմալ ջուր տան, էլի: Գարնանը ջուրը խմելու չի լինում, կեղտաջուր է գալիս: Հիմա ի՞նչ է ստացվում` էդ կեղտաջրի համար պիտի կրկնակի վճարե՞նք: Գազի գինն էլ են բարձրացնում: Դա դրսից ենք առնում, ինչ-որ տեղ հասկանալի է, բա ջո՞ւրը, հո դա էլ չենք ներկրում, գոնե կարելի է դրա գինը չբարձրացնեն: Խեղճ ժողովրդի համար ե՞րբ են մտածել, որ հիմա մտածեն»,- ասում է 78-ամյա Գրիշա պապը:

Բարձրացված սակագների մասով Կառավարությունը ոչ մի փոխհատուցում չի նախատեսում: Այս մասին հայտնի դարձավ Ազգային ժողովի վերջին նիստի ժամանակ, որի ընթացքում սակագների մասին հարց է բարձրացրել ԱԺ նախագահ Աշոտ Ղուլյանը: Ի պատասխան` վարչապետ Արա Հարությունյանը հիշեցրեց, որ սակագները կարգավորում է հանրային ծառայությունները եւ տնտեսական մրցակցությունը կարգավորող հանձնաժողովը, որի հետ էլ բանակցում են տնտեսվարող սուբյեկտները, փորձում ընդհանուր համաձայնության գալ:

«Կառավարությունը չի կարող միջամտություն ցուցաբերել, բայց մեր ներկայացուցիչները մասնակցում են քննարկումներին, եւ փորձում ենք ինչ-որ ձեւով մեղմացնել սակագնային քաղաքականությունը: Ամեն տարեվերջի մենք ստիպված ենք լինում կոմունալ ծառայությունների պարտքերի մարման համար պետբյուջեից տասնյակ, շատ ավելի դեպքերում` հարյուրավոր միլիոնների գումարներ ուղղել աշխատավարձերի, հոսանքի դիմաց վճարումների, տեխնիկայի ձեռքբերման համար եւ այլն: Պատճառն այն է, որ այսօրվա սակագինը չի համապատասխանում իրականությանը: Մենք պետք է տարանջատենք սոցիալական քաղաքականությունը տնտեսական գործունեությունից»,- նկատեց վարչապետը:

Նրա հավաստմամբ` շատ դեպքերում, երբ հաշվարկները ցույց են տալիս, որ գինը պետք է ավելի բարձր լինի, Կառավարությունը փորձում է սուբսիդավորման քաղաքականություն իրականցնել: Վարչապետի հավաստմամբ` այս տարվա պետբյուջեով նման հնարավորություն ընձեռված չէ: