«Շատ շենքեր կան, որոնք չեն մտնում պետության կողմից պահպանվող հուշարձանների ցուցակի մեջ, սակայն թամանյանական դպրոցի շենքեր են եւ կարեւոր են` քաղաքի տեսքն ամբողջական դարձնելու առումով»,- այսօր «Ուրբաթ» ակումբում տեղի ունեցած մամուլի ասուլիսի ժամանակ ասաց Ճարտարապետների միության նախագահ Մկրտիչ Մինասյանը: Անզեն աչքով էլ երեւում  է, որ վերջին տարիներին կառուցված շենքերը պատահականորեն են կառուցված: Նրա ասելով` այստեղ դեր են կատարել եւ քաղաքական եւ տնտեսական փոփոխություննները: Միայն Հյուսիսային  պողոտան բավական է` ասելու համար, որ քաղաքային միջավայրը չի պահպանվում: «Կենտրոնի խիտ կառուցապատումը` հասարարական վայրերից խլված հողերի հաշվին, աղավաղում են պուրակների, այգիների ուրվագծերը, ծանրաբեռնում են դրանք»: Քաղաքը փոփոխվող մարմին է, այն անընդհատ փոփոխվում է: Կարելի է ավելի լավ շենքեր կառուցել: Քաղաքաշինության նպատակը հենց դա է` կառուցել եւ պահպանել տեսքը: Օրենքով ամրագրված  է, որ պետք է նաեւ քաղաքի պահանջները կատարել, բայց այդ օրենքները չեն գործում: Ճարտարապետի խոսքերով` սովորաբար շենքերն առանց խնայելու այնքան են շահագործում, որ այն այլեւս օգտագործել չի լինում. շենքը ժամանակից շուտ ծերանում է եւ դառնում վթարային: Այն օտարում են եւ տեղում այլ շենք կառուցում, մինչդեռ դրանից կարելի է խուսափել` շենքը պարբերաբար վերանորոգելով: Մ. Մինասյանի կարծիքով` բոլոր քաղաքներն  էլ ձգտում են ժամանակակից տեսք ունենալ, բայց պահպանում են դեմքը, որպեսզի այն ճանաչելի լինի, չկրկնվի: Աշխարհի բոլոր երկրներն ունեն այդ մոտեցումը, իսկ մենք ուղղակիորեն քանդում ենք, չենք պահպանում մեր դիմագիծը: Մարիամ Մուղդուսյան