«Կանաչ Աստվածների վերադարձը»
Այսօր Ավետիք Իսահակյանի անվան գրադարանում տեղի ունեցավ Վահե Արսենի «Կանաչ Աստվածների վերադարձը» գրքի շնորհանդեսը: Գիրքը թարգմանվել է նաեւ հոլանդերեն: Հիշեցնենք, որ Վահե Արսենին շնորհվել է հոլանդական լավագույն երիտասարդ բանաստեղծների «Jambe 2010» ամենամյա մրցանակը: Բանաստեղծը մրցանակաբաշխությանը ներկա չի եղել, ուստի այսօր շնորհանդեսի ժամանակ մրցանակը նրան հանձնեց ԳՄ նախագահ Լեւոն Անանյանը:
«Վահե Արսենը կարեւոր խոսք է ասում գրականության մեջ: Նա գրում է հենց այնպես, ինչպես իր ժամանակն է պահանջում, ինչպես երիտասարդներն են խոսում եւ ուզում լսել»,- ասաց Լեւոն Անանյանը: Շնորհանդեսի ժամանակ իրենց խոսքն ասացին այլ գրականագետներ, բանաստեղծի գործերից կարդացին եւ իրենց տպավորությունների մասին խոսեցին նաեւ նրա ընթերցողներից ոմանք: «Եթե ինչ-որ բան կարդում ես, ու այն հարազատ է լինում քեզ, դու զգում ես դա, ուրեմն այն չի կարող չհուզել քեզ, ինչպես ես եմ հիմա հուզվել»,-ասաց Վահե Արսենի ընթերցողներից Անուշ Քոչարյանը:
Մեկնաբանել