Գների աճ Ձեթ մատակարարող կազմակերպությունները խանութպաններին երեկ տեղեկացրել են, որ այսօրվանից ձեթերի գրեթե բոլոր տեսակների մեծածախ գները թանկանում են 50 դրամով: Մատակարարները դա բացատրել են դրամի արժեզրկմամբ: Այս կերպ ասած` այն ձեթը, որի մեծածախ գինը մինչեւ երեկ 590 դրամ էր, այսօրվանից խանութներին կմատակարարվի 640 դրամով: Փաստորեն` ձեթերի մեծածախ գինը կթանկանա մոտ 7 տոկոսով: Թե ինչպես դա կանդրադառնա մանրածախ գների վրա, առայժմ դժվար է ասել: Նշենք, որ վերջին մի քանի օրերի ընթացքում նորզելադնական կարագի մեկ կիլոգրամի մեծածախ գինը բարձրացել է 1980 դրամից` 2050 դրամի, իսկ մեկ պարկ (50 կիլոգրամ) շաքարավազի գինը` 15 հազար 500 դրամից հասել է 16 հազար 250 դրամի: Սպասվում է, որ առաջիկա օրերին կթանկանան եւս մի քանի ապրանքներ: Իրավիճակն ավելի վտանգավոր է դառնում «Որքան շուտ Լեռնային Ղարաբաղը մասնակից դառնա ընթացող բանակցություններին, այնքան լավ»,- երեկ Երեւանում շարունակվող ՆԱՏՕ-ի խորհրդարանական վեհաժողովի «Ռոուզ Ռոթ» սեմինարի ժամանակ նշել է ԵԱՀԿ Մինսկի խմբի համանախագահ Բեռնար Ֆասիեն: Մինչդեռ, ըստ նրա, ԼՂ մասնակցություն ասելով չպետք է հասկանալ Լեռնային Ղարաբաղի Հանրապետությունը, քանի որ այն ճանաչված պետություն չէ որեւէ երկրի կողմից: Ֆրանսիացի համանախագահը նշել է, որ շատ արդար է, որ ԼՂ բնակչությունը նույնպես ցանկանում է մասնակից լինել այն բանակցություններին, որոնք շոշափում են իր կենսական շահերը, սակայն դա կարող է տեղի ունենալ միայն այն ժամանակ, երբ ԼՂ բոլոր բնակիչները, այդ թվում նրանք, ովքեր ապրում էին այդ տարածքում նախքան հակամարտությունը, վերադառնան իրենց նախկին բնակավայրերը: «Երբ մարդիկ խաղաղության մեջ կապրեն եւ իրար հարեւաններ կհամարեն, եւ այն մարդիկ, ովքեր նախկինում ապրում էին այնտեղ, վերադառնան, այդ ժամանակ, ակնհայտ է, որ նրանք իրավունք ունեն պահանջել, որպեսզի մասնակցեն բանակցություններին»,- հայտարարել է Ֆասիեն ու հավելել, որ Ռոբերտ Քոչարյանն է ցանկացել, որպեսզի բանակցություններում ինքը ներկայացնի եւ Հայաստանը եւ Ղարաբաղը: Իսկ Ճգնաժամային խմբի եվրոպական ծրագրերի տնօրեն Սաբինա Ֆրեյզերը իր հերթին հայտարարել է. «Ղարաբաղի խնդրում ամեն ինչ ավելի մռայլ է, մոխրագույն, քան 5 տարի առաջ»: Թուրքական զորքեր` Լաչինի միջանցքո՞ւմ Թուրքական «Sabah» օրաթերթի փոխանցմամբ, Անկարան պատրաստակամություն է հայտնել զորակազմ ուղարկել Լաչինի միջանցք` անվտանգության ապահովման նպատակով: Բացի այդ, ըստ թուրք պարբերականի, Անկարան սկսել է ջանքեր գործադրել, որպեսզի Ադրբեջանը հրաժարվի պատերազմը վերսկսելու ռազմատենչ հայտարարություններից: Թերթը, վկայակոչելով անանուն բարձրաստիճան դիվանագետին, գրում է. «Ղարաբաղյան հիմնախնդրի կարգավորումը պետք է լինի բացառապես խաղաղ ճանապարհով: Ադրբեջանը որոշ ներքաղաքական հաշվարկներ կարող է ունենալ: Սակայն պատերազմի մասին կոչերը տեղին չեն»: Մանկապարտեզը վաճառե՞լ են Երեկ Մասիսի թիվ 1 մանկապարտեզում կռիվ է բռնկվել ոստիկանների, այդ թվում մանկապարտեզի ղեկավարների եւ հարեւանությամբ բնակվող քաղաքացիների մասնակցությամբ: Տարածքի բնակիչների ասելով` մանկապարտեզի շենքը բոլորից թաքուն վաճառվել է 5 անհայտ քաղաքացու: Ըստ տեղացիների, գործարքը կատարվել է նախկին քաղաքապետ Սաշա Հակոբյանի եւ նախկին մարզպետ` ներկայիս ոստիկանապետ Ալիկ Սարգսյանի միջնորդությամբ: «Այս մանկապարտեզը հիմա էլ գործում է, մեր երեխաներն այնտեղ են գնում: Հիմա էլ ոստիկանների հետ եկել են, որ բոլորին դուրս հանեն ու տարածքը հատկացնեն անօրինական սեփականատերերին: Կտրել են ցանկապատները, հետո էլ ծառերն են կտրելու, լողավազանն ու տաղավարը քանդեն: Անգամ մեկ «սեփականատիրոջ» տարածքն արդեն հասցրել է վերավաճառվել»,- թերթին պատմել են միջադեպի մասնակիցները: Կտրվելու են ծառերը Պուշկինի փողոցի վրա, Ժուռնալիստների տան դիմաց ցանկապատված այս տարածքում կառուցվելու է ստորգետնյա ավտոկայանատեղի, քանի որ Սամվել Մայրապետյանի` Աբովյան-Պուշկին խաչմերուկում կառուցած էլիտար շենքի բնակիչների էլիտար մեքենաները կանգնելու տեղ չունեն: Այստեղ` հենց Ժուռնալիստների միության նախագահ Աստղիկ Գեւորգյանի աչքի առաջ, Երեւանի կենտրոնում կտրվելու են ծառերը, եւ հերթական անիմաստ կառույցն է ստեղծվելու: Վահագն Չախալյանի դեմ նոր գործ է հարուցվել Երեկ «Երկիր» միությունից տեղեկացրին, որ ջավախահայ քաղաքական գործից Վահագն Չախալյանի նկատմամբ վրացական իշխանությունները հարուցել են նոր քրեական գործ` 2005-ի հուլիսին Ջավախքի Սամսար գյուղի հայ եկեղեցու վրացականացման ձախողված փորձի եւ նույն թվականի դեկտեմբերին հայ-վրացական սահմանի` Բավրայի անցակետի մոտ տեղի ունեցած ջավախահայության բողոքի ցույցի առնչությամբ: Հերթը Մեծ Բրիտանիայինն է ԱՄՆ-ից եւ Շվեդիայից հետո Հայոց ցեղասպանության մասին օրինագիծ կքննարկվի նաեւ Անգլիայի Համայնքների պալատում: Համայնքի պալատի 12 պատգամավորների ստորագրությամբ ստեղծված հանձնաժողովը ապրիլի 24-ը որպես Հայոց ցեղասպանության հիշատակի օր պաշտոնապես նշելու մասին պահանջը ուսումնասիրության է վերցրել հունվարին: