Նախօրեին «Զվարթնոց» օդանավակայանում ԱԱԾ աշխատակիցները, Ոստիկանության հետ համատեղ  իրականացված միջոցառումների արդյունքում,  կասեցել են թմրամիջոցների մաքսանենգ տեղափոխման  ևս մեկ փորձ: Երևան-Մոսկվա-Բանգկոկ չվերթի չորս օտարերկրյա ուղևորի անձնական զննության ժամանակ նրանց որովայնում հայտնաբերվել է պոլիէթիլենային 130 հատ փոքրիկ  տոպրակներում` 1կգ 345 գրամ ընդհանուր քաշով «մետամֆետամին» տեսակի  թմրանյութ, որը բժշկական միջամտությամբ հանվել է դուրս: ԱԱԾ մամուլի կենտրոնից հայտնում են, որ մարտի 10-ին ևս Ազգային անվտանգության ծառայության մարմինները կասեցրել են Երևան-Մոսկվա-Բանգկոկ տարանցիկ ճանապարհով թմրամիջոցների մաքսանենգ տեղափոխման հերթական փորձը: Դարձյալ «Զվարթնոց» օդանավակայանում երեք օտարերկրյա  ուղևորի բեռների  զննության ընթացքում հայտնաբերվել է 4 կգ 656 գրամ «մետամֆետամին» տեսակի  թմրանյութ, որը ներծծված է եղել ուղեբեռներում գտնվող բրդյա բաճկոնների մեջ: Նույն օրը Երևան քաղաքում բացահայտվել և ձերբակալվել են հանցավոր խմբի երկու պարագլուխները, որոնք կազմակերպել էին թմրամիջոցի մաքսանենգ ներկրումը և արտահանումը: Հարուցված  քրեական գործերով նախաքննությունը կատարում է ՀՀ ազգային անվտանգության ծառայության քննչական վարչությունը: