Միացյալ Թագավորությունում ՀՀ դեսպան Վահե Գաբրիելյանը մասնակցել է Առաջնորդների oքսֆորդյան գագաթնաժողովին Մարտի 15-ին Օքսֆորդի քաղաքապետարանի նիստերի դահլիճում տեղի ունեցավ Առաջնորդների oքսֆորդյան գագաթնաժողովը (Oxford Summit of Leaders), որին ելույթ ունեցավ  Միացյալ Թագավորությունում ՀՀ դեսպան Վահե Գաբրիելյանը:  Եվրոպական բիզնես ասամբլեայի (Europe Business Assembly) կողմից կազմակերպող գագաթնաժողովն այս տարի նվիրված էր Եվրոպական Միության Արևելյան համագործակցության ծրագրին, հատկապես` դրա մասնակից և ԵՄ երկրների միջև կրթական և տնտեսական համագործակցությանն ու ներդրումային հնարավորություններին: Դեսպան Գաբրիելյանը ներկայացրեց Հայաստանի Հանրապետության և Եվրոպական Միության միջև ՀՀ անկախությունից ի վեր ծավալված համագործակցությունը, մասնավորապես` Եվրոպական հարևանության ծրագրի և Արևելյան համագործակցության նախաձեռնության շրջանակներում ձեռնարկված քայլերը, այդ համագործակցության խորացման նպատակով Հայաստանում համապատասխան կառույցների ձևավորման և աշխատանքների կատարման ընթացքը: Դեսպան Գաբրիելյանը կարևորեց Հայաստանի և Եվրոպական Միության միջև քաղաքական երկխոսության հետագա խորացումը, ազատ առևտրի մասին համաձայնագրի կնքումը, մուտքի արտոնագրային ռեժիմի դյուրացումը և ասոցիացման համաձայնագրի կնքման բանակցությունների մեկնարկը: Դեսպանը նաև անդրադարձավ Հայաստանում ներդրումային բարենպաստ պայմաններին և նշեց եվրոպական ինտեգրման գործում ՀՀ հասարակության և իշխանությունների հաստատակամությունն ու հետևողականությունը: ՀՀ ԱԳՆ մամուլի, տեղեկատվության և հասարակայնության հետ կապերի վարչության փոխանցմամբ, միջոցառմանը մասնակցում էին ավելի քան քսան երկրներից ժամանած քաղաքական, կրթական, գիտական և տնտեսական ոլորտներիառաջատար ներկայացուցիչներ: