«Այս ամենը հայրենիքի գովքն է, իմ զգացմունքը հայոց աշխարհի նկատմամբ: Այն ամենն, ինչ ստեղծվել է, ինձ հոգեհարազատ է: Առանց հոգու արվեստ չի ստեղծվում»,- այսօր Նկարիչների միությունում բացված իր անհատական ցուցահանդեսի ժամանակ ասաց Ազգային պատկերասրահի տնօրեն, գեղանկարիչ Փարավոն Միրզոյանը: Նրա ներկայացրած գրաֆիկական եւ գեղանկարչական աշխատանքների կողքին առանձնահատուկ տեղ են զբաղեցնում հատկապես 2 պանոները: Դրանցից մեկը կոչվում է «Արցախ»: Արցախին նվիրված պանո առաջին անգամ է արվում, եւ Փարավոն Միրզոյանի խոսքերով` իր ստեղծած պանոն պարզապես սիրո դրսեւորում է: Նկարչի խոսքերով` ցուցադրված գործերն ընդգրկում են վերջին 5 տարիների աշխատանքները եւ ամբողջությամբ նվիրված են հայրենիքին: «Ես ուրախ եմ, որ այստեղ կարողացա տեսնել Արցախի պանոն: Շատ գեղանկարիչներ են անդրադարձել Արցախին, բայց սա հատկապես կարեւոր է, քանի որ ներկայացվում է պանոյի տեսքով: Ուրախ եմ, որ ցուցասրահում  ներկայացվում են նաեւ պանոներ, եւ այցելուները կարող են գալ ու դիտել դրանք»,- ասաց այցելուներից Աննա Գեւորգյանը: Մարիամ Մուղդուսյան