Ո՞վ կարող էր տուգանքի չափը 20 անգամ պակասեցնել
Բնապահպանական պետական տեսչության պետի արդեն նախկին տեղակալ Արսեն Պետրոսյանի գլխավորությամբ անցյալ տարվա հոկտեմբերին «Ախթալայի լեռնահարստացման կոմբինատ» ՓԲԸ-ում անցկացվել են ստուգումներ, որի արդյունքում արձանագրված խախտումներով բյուջե վճարման ենթակա վնասը հաշվարկվել է 202 մլն դրամի չափով: Ընկերության գլխավոր տնօրեն Վլադիմիր Գլադչենկոն և նրա տեղակալ Լեւոն Վարդանյանը հրավիրվել են նախարար Արամ Հարությունյանի մոտ քննարկման, ինչից հետո հաշվարկված վնասը կազմել է ընդամենը 10 մլն 141.6 հազար դրամ:
«Ո՞վ կարող էր գումարը մոտ 20 անգամ պակասեցնել, ո՞ւմ մակարդակի խնդիր էր սա»,- հարցրեց դատավոր Ժորա Վարդանյանը ՓԲԸ-ի գլխավոր տնօրենի տեղակալ Լեւոն Վարդանյանին: Վերջինս ասաց, թե ինքը չգիտի:
Լեւոն Վարդանյանին այսօր դատարանում հարցաքննվում էր որպես վկա` կաշառակերության համար մեղադրվող Բնապահպանական պետական տեսչության նախկին պետ Տիգրան Գրիգորյանի և նրա տեղակալ Արսեն Պետրոսյանի գործով:
Վկան տեղեկացրեց, որ «Ախթալայի լեռնահարստացման կոմբինատ» ՓԲԸ-ն պետք է 6-ամսյա ժամկետում` մինչև անցյալ տարվա հոկտեմբեր, կառուցեր շրջանառու ջրամատակարարման համակարգ: Սակայն ընկերությունն այն չի կառուցել` խնդրելով վերջնաժամկետը երկարաձգել մինչև 2011 թ. հունվար:
Լեւոն Վարդանյանը պարզաբանեց, թե որոշվել է համակարգը կառուցելու համար նախատեսված գումարն ուղղել սոցիալական ծրագրերին, որպեսզի հնարավոր լինի ֆինանսատնտեսական ճգնաժամի պայմաններում աշխատատեղերը չկրճատել:
Վարդանյանը նշեց, որ երևի քննարկման ժամանակ իրենց ներկայացրած առարկություններն են հաշվի առնվել ու դրա շնորհիվ էլ ակտը կազմվել է ընդամենը 10 մլն դրամի չափով:
Նախարարությունը պետք է ՓԲԸ-ի` համակարգի կառուցման ժամկետը երկարաձգելու խնդրանքին պատասխաներ նամակով: Լ. Խաչատրյանի խոսքերով` Արսեն Պետրոսյանն իրեն հեռախոսով ասել է, թե պատասխանը կարող է լինել և´ դրական, և´ բացասական, ու խնդրել է զրուցելու համար հանդիպել:
«Այդպես էլ ես չհանդիպեցի Արսեն Պետրոսյանին: Դեկտեմբերի վերջին նա զանգեց, թե` շտապ պետք է հանդիպենք: Ասացի` չեմ կարող, Ախթալայում եմ»,- պատմում է վկան: Նա Պետրոսյանի հետ պայմանավորվել է, որ ՓԲԸ-ից հանդիպմանը կգնա գործից հասկացող մեկը: Վկան միաժամանակ նշեց, որ մյուս մեղադրյալին` Տիգրան Գրիգորյանին չի ճանաչում, իսկ Պետրոսյանն իր հետ խոսակցություններում երբևէ գումար տալու մասին որևէ ակնարկ չի արել:
Այն, որ ՓԲԸ-ի ներկայացուցիչը Արսեն Պետրոսյանին 5 մլն դրամ կաշառք է տվել, Լ. Վարդանյանի խոսքերով, ինքն այդ մասին իմացել է «Հետքի» կայքէջից:
Այսօրվա նիստում հարցաքննված երկրորդ վկան հենց կաշառք տվողն էր` ընկերության խորհրդի նախագահի օգնական Հրանտ Ավագյանը: Նա պատմեց, որ 2009 թ. դեկտեմբերի 26-ին, քանի որ աշխատակիցներից ինքն էր Երևանում, ընկերության սեփականատեր Սերոբ Տեր-Պողոսյանի հանձնարարությամբ հենց ինքն էլ գնացել է Բնապահպանության նախարարություն ու հանդիպել Արսեն Պետրոսյանի հետ:
«Վերջին հաշվով, պետք է ճշտեինք, թե ինչ է պետք, որ նամակի պատասխանը դրական լինի,- ասաց վկա Ավագյանը: Ըստ նրա` Ա. Պետրոսյանը «շատ բարդ ձևով է պրոբլեմը ներկայացրել», ասել է, թե շատ մարդիկ կան հետաքրքրված, շատերին պետք է լավություն անի, բայց թե կոնկրետ ում, անուններ չի նշել:
«Սկզբում 15 մլն դրչամ ուզեց: Ասացի, որ դա ֆանտաստիկ գումար է: Վերջը պայմանավորվեցինք 5 մլն դրամի մասին, ասացի, որ պետք է ղեկավարությանը տեղյակ պահեմ ու դուրս եկա»,- շարունակում է Հրանտ Ավագյանը:
Նրա պատմելով, իմանալով այս ամենը` ընկերության սեփականատեր Տեր-Պողոսյանը բարկացել է ու հանձնարարել դիմել ոստիկանության 6-րդ վարչություն: Այստեղ ոստիկանները նրան տվել են հատուկ նշագրված թղթադրամներ, ինչն էլ դեկտեմբերի 28-ին ինքը տվել է Արսեն Պետրոսյանին` հենց վերջինիս աշխատասենյակում:
«Հարցրի` չե՞ք հաշվում, բա` չէ, վստահում եմ: Հետո զանգեց ընդհանուր բաժին, ասաց, որ Հրանտ Ավագյանը կգա, նամակը տվեք իրեն: Գնացի, բայց ընդհանուր բաժնի տեղը չգտա: Վերադարձա Ա. Պետրոսյանի աշխատասենյակ, ինքը գլուխաը կախ գումարն էր հաշվում»,- հիշում է վկան: Նրա ասելով, երբ նամակը վերցրել ու միջանցքով վերադառնալիս է եղել, տեսչության պետի տեղակալի աշխատասենյակի մոտ արդեն հավաքված են եղել իրավապահները:
Վկա Հրատ Ավագյանը նույնպես իր ցուցմուքներում տեսչության պետ Տիգրան Գրիգորյանի անունը որևէ դրվագում չհիշատակեց: Դատավարությունը կշարունակվի հաջորդ շաբաթ: Ըստ մեղադրական եզրակացության` Արսեն Պետրոսյանն իր գործողությունները համաձայնեցրել է անմիջական ղեկավարի` Տ. Գրիգորյանի հետ և հիշյալ 5 միլիոնից 3 մլն 790 հազար դրամը փոխանցել է նրան:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել