Բրիտանական խորհրդի (British Council) հայաստանյան գրասենյակը եւ Բրիտանական դեսպանատունը Երեւանում տեղեկացնում են, որ երկուշաբթի` մարտի 22-ին, ժ. 17.00-ին, Շառլ Ազնավուրի անվան հրապարակում կկայանա Բրիտանական ֆիլմերի 8-րդ փառատոնի բացման արարողությունը, որին կհետեւի օսկարակիր «Դքսուհի» ֆիլմի ցուցադրությունը «Մոսկվա» կինոթատրոնի կարմիր դահլիճում: Արդեն ավանդույթ դարձած ամենամյա Բրիտանական Ֆիլմերի փառատոնը կոչված է Ֆիլմարվեստի միջոցով հայ հանդիսատեսին ներկայացնել Միացյալ Թագավորությունը, երկրի անցյալն ու ներկան, մշակույթը, կենցաղն ու սովորույթները, ինչպես նաեւ Ֆիլմերի օգնությամբ նպաստել անգլերենի տարածմանը եւ ստեղծագործ մտքի զարգացմանը: Ավանդաբար փառատոնի տոմսերի վաճառքից գոյացած ողջ հասույթն օգտագործվում է բարեգործական նպատակներով. այս տարի այն ուղվելու է Երեւանի թատրոնի եւ կինոյի պետական ինստիտուտի տեխնիկական աջակցմանը: Հերթական 8-րդ փառատոնի շրջանակում, որն անց է կացվում 2010թ մարտի 22-ից 26-ը, ցուցադրվելու են բրիտանական արտադրության բազմաթիվ մրցանակների արժանացած 6 Ֆիլմեր, նախատեսված են բաց ցուցադրություններ, որոնցից մեկին` «Արյունոտ կիրակի՚»- ին կհաջորդի քննարկում ֆիլմի համապրոդյուսեր Միացյալ Թագավորությունից ժամանած հատուկ հյուր Դան Մալանի հետ: Փառատոնի օրերին «Արձագանքներ. ֆիլմեր Հյուսիսային Իռլանդիայից» ծրագրի շրջանակում կազմակերպվելու են ցուցադրություններ եւ քննարկումներ նաեւ Վանաձորում (մարտի 24-25): Բրիտանական ֆիլմերի 8-րդ փառատոնի շրջանակում ցուցադրվող ֆիլմերի ժամանակացույցն ու ֆիլմերի համառոտ նկարագրությունները կարող եք գտնել www.britfilms.am կայքէջում: