Շուշիի ողբերգության 90-րդ և Բաքվի ջարդերի 20-րդ տարելիցներին նվիրված գիտաժողով
Ստեփանակերտում մեկնարկել է «Ադրբեջանի պետական ահաբեկչության ու էթնիկական զտումների քաղաքականությունը Լեռնային Ղարաբաղի դեմ» խորագրով միջազգային գիտագործնական կոնֆերանսը, որը նվիրված է Շուշիի ողբերգության 90-րդ և Բաքվի ջարդերի 20-րդ տարելիցներին:
Միջոցառումը նախաձեռնել են ԼՂՀ կրթության և գիտության, մշակույթի և երիտասարդության հարցերի նախարարությունները, Արցախի պետական համալսարանը և «Կաճառ» գիտամշակութային կենտրոնը: Այսօր առավոտյան` մինչև գիտաժողովի բացումը, Ազգային ժողովի ճեմասրահում տեղի ունեցավ «Արտոնված ցեղասպանություն» խորագրով լուսանկարների ցուցադրությունը: Կոնֆերանսի 25 զեկուցողները հիմնականում ՀՀ-ից և Արցախից են, մի քանի հոգի էլ` ՌԴ-ից ու Գերմանիայից:
Միջոցառումը կշարունակվի մինչև մարտի 24-ը: Վաղը մասնակիցները կշարունակեն իրենց աշխատանքը և արդյունքները կամփոփեն Շուշիում: Նախատեսվում է, որ երեկոյան գիտաժողովի մասնակիցները կհանդիպեն նախագահ Բակո Սահակյանի հետ:
Մեկնաբանել