Կապանի Օրհուս կենտրոնում օրեր առաջ տեղի է ունեցել հանրային քննարկում` Կապան համայնքի խմելու ջրի որակի վերաբերյալ: Քննարկումը տեղի է ունեցել այն բանից հետո, երբ Կապանի ազգաբնակչությունը վեց օր մնացել էր առանց խմելու ջրի: Քննարկմանը մասնակցել են հասարակական կազմակերպությունների, ԶԼՄ-ների, պետական կառույցների և այլ կազմակերպությունների ներկայացուցիչներ: «Էկոլոգիական Անվտանգության Ապահովման Եվ Ժողովրդավարության Զարգացման» ՀԿ-ն 2009 թ. հունիսից ահազանգում է Կապանում խմելու ջրի աղտոտվածության վերաբերյալ: Մենք գրություններով դիմել ենք «Հայջրմուղկոյուղի» տնօրեն Պատրիկ Լորենին, հարավային տարածքային տնօրեն Ջ. Մարգարյանին և ՀՀ Առողջապահության նախարար Հ.Քուշկյանին` մատնանշելով Կապան համայնքի խմելու ջրի հիմնախնդիրները: Խմելու ջրի համար նախատեսված կուտակման ավազանը (գլխամասը), սանիտարական գոտին կահավորված չէ ՀՀ օրենսդրությունով նախատեսված պայմաններով: Դրա  պատճառով մշտապես վարչական տուգանքի է ենթարկվում վերոհիշյալ ընկերությունը, բայց առ այսօր չի կարգավորվում այդ հարցը: Խմելու ջրի մաքրման կայանը չի գործում. միայն քլորացվում է ջուրը, և առաջանում է մեկ ուրիշ խնդիր. մինչև մաքրման կայան հասնող խողովակաշարի վրա տեղադրված են մի քանի հիդրոէլեկտրոկայաններ: Խողովակաշարը մաշված է և ոչ պիտանի, դրա համարել սիստեմատիկ առաջանում են վթարներ: Մենք պահանջում ենք, որպեսզի «Հայջրմուղկոյուղի» ՓԲԸ-ն ոչ թե ներդրումային գումարներ փնտրի աշխարհով մեկ, այլ ժողովուրդից գանձած վարձավճարներից, ստացած գերշահույթներց իրականացնի վերոհիշյալ խնդիրների լուծումը: Այլապես ընկերությունն ինչո՞ւ է ստանձնել Կապանի խմելու ջրի մատակարարման կառավարումը, եթե մինչ օրս իրեն տրամադրած 41 միլիոն դոլլարից մեկ դոլլար չի տրամադրվել վերոհիշյալ խնդիրների լուծմանը: Պահանջում ենք փոփոխություններ մտցնել ջրամատակարարման ընկերության և ազգաբնակչության հետ կնքած պայմանագրերում: Ամբողջությամբ խախտվել է սպառողների իրավունքները և ՀՀ Սահմանադրության որոշ կետեր: Մատնանշված խնդիրները շտապ չլուծելու դեպքում մեր կազմակերպությունը կիրականացնի ստորագրահավաք, որպեսզի Կապան համայնքի ջրամատակարարման կառավարումը վերադարձվի Կապան համայնքին: Նշենք, որ Քաջարան համայնքի ջրամատակարարումը չունի նման խնդիրներ, և սակագինը շատ ավելի ցածր է, քան Կապանում, որովհետև կառավարումն իրականացնում է հենց  ինքը համայնքը: Մեր կարծիքով` «Հայջրմուղկոյուղի» ՓԲԸ-ի աշխատանքը Կապան համայնքի ազգաբնակչության կյանքին և առողջությանը վտանգ է սպառնում: Մենք կոչ ենք անում Կապանի համայնքապետ Արտուր Աթայանին  և Կապանի ազգաբնակչությանը մեզ հետ միասին պայքարեն մաքուր խմելու ջուր ունենալու մեր իրավունքի համար: «Էկոլոգիական Անվտանգության Ապահովման Եվ Ժողովրդավարության Զարգացման» հասարակական կազմակերպություն